کراچی میں قیامت صغریٰ کاعالم ہے لیکن بیشترقبرستانوں میں گورکن میتوں کی تدفین کیلئے لواحقین سے منہ مانگے پیسے وصول کررہے ہیں۔رابطہ کمیٹی ایم کیوایم

کراچی ۔۔۔ 23 جون 2015ء

متحدہ قومی موومنٹ کی رابطہ کمیٹی نے کراچی کے قبرستانوں میں گورکنوں کی جانب سے میتوں کی تدفین کیلئے منہ مانگے پیسے وصول کرنے کی اطلاعات پر سخت افسو س کااظہارکیاہے ۔ اپنے ایک بیان میں رابطہ کمیٹی نے کہاکہ شدیدگرمی اورلو لگنے کے باعث شہرمیں سینکڑوں افراد جاں بحق ہوئے ہیں، شہرمیں قیامت صغریٰ کاعالم ہے لیکن یہ امرانتہائی افسوسناک ہے کہ شہرکے بیشترقبرستانوں میں گورکن ان میتوں کی تدفین کیلئے ان کے لواحقین سے منہ مانگے پیسے وصول کررہے ہیں جس کی وجہ سے لواحقین دہرے غم اورپریشانیوں میں مبتلاہیں ۔ رابطہ کمیٹی نے وزیراعلیٰ سندھ سیدقائم علی شاہ اورکمشنرکراچی سے مطالبہ کیا کہ اس معاملے کافوری نوٹس لیاجائے اورگورکنوں کواس بات کاپابندبنایاجائے کہ وہ میتوں کی تدفین کے لئے شہریوں سے منہ مانگے پیسے وصول کرنے سے گریزکریں۔