دین اسلام اور اقوام متحدہ کا چارٹر دنیا کے ہر انسان کو ظالم قوتوں سے دفاع کا حق دیتا ہے، الطاف حسین

لندن۔۔۔15،جون2015ء

متحدہ قومی موومنٹ کے قائد جناب الطاف حسین نے کہاہے کہ دین اسلام اور اقوام متحدہ کا چارٹر دنیا کے ہرانسان کو ظالم قوتوں سے دفاع کا حق دیتا ہے ۔ ان خیالات کا اظہار جناب الطاف حسین نے نائن زیروعزیزآباد کراچی اور اسلام آباد میں ایم کیوایم کی رابطہ کمیٹی ، حق پرست ارکان سینیٹ، قومی وصوبائی اسمبلی اور مختلف شعبہ جات کے ذمہ داران کو مختلف موضوعات پر اپنے ایک طویل لیکچر میں کیا۔ اس موقع پر شرکاء نے جناب الطاف حسین سے مختلف سوالات کیے جن کے جناب الطاف حسین نے مفصل جوابات دیئے۔ دین اسلام اور جنگ کے حوالہ سے پوچھے گئے ایک سوال کے جواب میں جناب الطاف حسین نے کہاکہ دین اسلام ،سلامتی کا مذہب ہے جو صبر، برداشت، محبت ،عفوودرگزر اورافہام وتفہیم سے کام لینے کا درس دیتا ہے اوربحالت مجبوری جنگ کرنے کی بھی اجازت دیتا ہے لیکن دین اسلام میں جنگ کرنے کی یہ اجازت انتہائی سخت پابندیوں کے ساتھ دی گئی ہے ۔ مثلاً جنگ کے دوران خواتین ، بزرگوں ، معصوم بچوں اور بیماروں پر ہرگز ہاتھ نہ اٹھایا جائے اور انہیں کسی بھی قسم کی گزند نہ پہنچائی جائے ،کھڑی فصلوں اور درختوں کو نہ کاٹاجائے اور دوسرے مذاہب کی عبادت گاہوں کو نقصان نہ پہنچایا جائے ۔ جناب الطاف حسین نے کہاکہ نبی کریم ؐ نے پہلی تین جنگوں میں سے کسی ایک جنگ کا آغاز بھی خود نہیں کیا بلکہ یہ تینوں جنگیں آپ ؐ اور صحابہ کرامؓ پر حملہ کرکے زبردستی مسلط کی گئی تھیں اور بحالت مجبوری آپ ؐ نے صحابہ کرامؓ کے ساتھ مل کرہرجنگ کا ہمت کے ساتھ سامنا کیا۔ جناب الطاف حسین نے کہاکہ اس بات سے یہ عندیہ اور اجازت ملتی ہے کہ کوئی طاقتورفریق کسی کمزور فریق پر باربار حملہ آور ہوتا رہے تو کمزورفریق کو اپنی حفاظت اوربچاؤکیلئے طاقتورفریق سے دفاع کا پورا پورا حق حاصل ہے اور اس کمزورفریق کو حالات وواقعات اور وجوہات کے مطابق دوسرے مددگاروں سے میثاق یا معاہدہ کرنے کی راہ بھی آنحضرتؐ نے دکھائی ہے جو میثاق مدینہ کے نام سے مشہور ہے ۔ جناب الطاف حسین نے کہاکہ دنیا کے ہرانسان کو یہ حق دین اسلام اور اقوام متحدہ کاچارٹر بھی دیتا ہے ۔
English Viewers