کراچی میں عیسیٰ نگری کے قریب دھماکہ پر جناب الطاف حسین کا اظہار مذمت

کراچی ۔۔۔20 جولائی 2013ء

متحدہ قومی موومنٹ کے قائد جناب الطاف حسین نے کراچی میں عیسیٰ نگری کے قریب دھماکہ اور اس کے نتیجے میں ایک پولیس اہلکار کی جاں بحق اور میونسپل کمشنر کراچی متانت علی خان سمیت متعدد افراد کے زخمی ہونے پر دلی افسوس کا اظہار کیا ہے اور واقعہ کی شدید الفاظ میں مذمت کرتے ہوئے اسے کھلی دہشت گردی قرار دیا ہے ۔ اپنے ایک بیان میں جناب الطاف حسین نے کہا کہ دہشت گردی کا واقعہ شہر کا امن برباد کرنے کی سازش ہے جس کی جتنی مذمت کی جائے کم ہے ۔ جناب الطاف حسین نے وفاقی وزیر داخلہ ، وزیراعلیٰ سندھ اور گورنر سندھ سے مطالبہ کیا ہے کہ عیسیٰ نگری دھماکہ کے واقعہ کا فوری نوٹس لیا جائے اور اس میں ملوث دہشت گردوں کو فی الفور گرفتار کرکے عبرتناک سزا دی جائے ۔ جناب الطاف حسین نے واقعہ میں شہید ہونے والے پولیس اہلکار کی مغفرت اور زخمی ہونے والے میونسپل کمشنر کراچی متانت علی سمیت دیگر افراد کی جلد و مکمل صحتیابی کیلئے دعا بھی کی ہے ۔