اسپیشل افراد کا ملازمتوں میں کوٹہ دو فیصد سے بڑھا کر تین فیصد کردیا گیا ہے لیکن اس کے باوجود اسپیشل افراد ملازمتوں سے محروم ہیں ، ڈاکٹر فاروق ستار

کراچی ۔۔۔10، جون 2015ء 

متحدہ قومی موومنٹ کی رابطہ کمیٹی کے رکن و رکن قومی اسمبلی ڈاکٹر فاروق ستار نے کہا ہے کہ اسپیشل افراد کے ساتھ ہونے والی زیادتیوں کا ازالہ کیاجائے ، پنجاب کے اسپیشل افراد نے احتجاج کا راستہ اختیار کیا اور دھرنا بھی دیا ہے جبکہ یہی صورتحال سندھ کی سطح پر بھی ہے ۔ یہ بات انہوں نے بدھ کے روز ایم کیوایم شعبہ پی ڈبلو ونگ کے اجلاس سے خطاب کرتے ہوئے کہی ۔ اس موقع پر شعبہ پی ڈبلیو ونگ کے انچارج عدنان سرور اور اراکین بھی موجود تھے ۔ ڈاکٹر فاروق ستار نے اپنے خطاب میں کہا کہ حکومتی سطح پر اسپیشل افراد کے حوالے سے گفت و شنید ضرور ہوتی ہے لیکن عملی اقدامات سے گریز کیاجاتا ہے ، اسپیشل افراد کا ملازمتوں میں کوٹہ دو فیصد سے بڑھا کر تین فیصد کردیا گیا ہے لیکن اس کے باوجود اسپیشل افراد ملازمتوں سے محروم ہیں ۔ انہوں نے کہاکہ ڈیلی ویجز پر جو افراد کام کررہے ہیں ان کو مستقبل کیاجائے۔ انہوں نے کہاکہ ایم کیوایم اسپیشل افراد کے حوالے سے حکومتی دہرے معیار کی شدید مذمت کرتی ہے اور اس پر ہر سطح پر صدائے احتجاج بلند کرے گی ۔انہوں نے کہاکہ اسپیشل افراد کی فلاح وبہبود کیلئے بار بار کی یقین دہانی کے باوجود عملدرآمد نہ ہونا قابل تشویش ہے لیکن امید ہے کہ حکومتی سطح پر اس اہم مسئلے پر ہنگامی بنیادوں پر مثبت فیصلے اور اقدامات بروئے کار لائے جائیں گے ۔ ڈاکٹر فاروق ستار نے حکومت سے مطالبہ کیا کہ معذور افراد کے کوٹے پر فی الفور عمل درآمد کیاجائے تاکہ ان افراد میں موجود احساس محرومی کو دور کیاجاسکے ۔
English