جناب الطاف حسین کی ہدایت پر ایم کیوا یم کے وفد کا بول ٹیلی ویژن کے دفتر کا دورہ

کراچی ۔۔۔30مئی2015ء

متحدہ قومی موومنٹ کے وفدنے جناب الطاف حسین کی ہدایت پر بول ٹیلی ویژن نیٹ ورک کے دفتر کا دورہ کرکے بول ٹیلی ویژن نیٹ کے باہر احتجاج میں بیٹھے ملازمین اور کراچی یونین آف جرنلٹس سے تعلق رکھنے والے صحافیوں سے ملاقات کی۔ ایم کیوا یم کے وفد میں رکن رابطہ کمیٹی وسیم اختر ، ایم کیوایم سینٹر ل ایگزیکٹو کونسل کے رکن سید امین الحق اور سندھ اسمبلی میں حق پرست اپوزیشن لیڈر خواجہ اظہار الحسن شامل تھے ۔وفد کے اراکین نے بول ٹیلی ویژن نیٹ کے ملازمین کو جناب الطاف حسین کی جانب سے اظہار یکجہتی کا پیغام پہنچایا۔اس موقع پر ایم کیوا یم کے وفد کے اراکین نے میڈیا نمائندگان سے گفتگو کرتے ہوئے کہاکہ بول ٹیلی ویژن کے ملازمین نے نہ تو ایگزیکٹ کمپنی قائم کی تھی اور نہ ہی وہ اس کے معاملات کے ذمہ دار ہیں ۔ انہوں نے کہاکہ بول ٹی وی میں ہزاروں ملازمین شامل ہیں جن میں رپورٹرز، فوٹوگرافرز،اسکرپٹ رائٹرز، ایڈیٹرز، مختلف شعبوں کے ٹیکنیشنز، ڈرائیورز اور سیکوریٹی کے عملے کے افراد بھی شامل ہیں۔انہوں نے حکومت سے مطالبہ کیا کہ وہ بول ٹیلی ویژن میں کام کرنے والے غریب ملازمین کو فاقہ کشی اورانکے اہل خانہ کو مشکلات سے بچانے کیلئے اقدامات کرے۔






English