ووٹ سے حق نہ ملا تو روڈ کی طاقت سے اپنا حق حاصل کریں گے، ایم این اے ڈاکٹر خالد مقبول صدیقی

حیدرآباد ۔۔۔25مئی 2015ء 

ایم کیو ایم رابطہ کمیٹی کے رکن و حق پرست ایم این اے ڈاکٹر خالد مقبول صدیقی نے کہا ہے کہ سندھ حکومت نے سندھ کی شہری آبادی کو مسلسل نظر انداز کیا ہوا ہے جس کی وجہ سے حیدرآباد بھی موہن جودڑو کی صورت اختیار کرتا جارہا ہے اور اگر ووٹ سے حق نہ ملا تو روڈ کی طاقت سے اپنا حق حاصل کریں گے ۔ان خیالات کا اظہار رکن رابطہ کمیٹی و حق پرست ایم این اے حلقہ - 219حیدرآباد ڈاکٹر خالد مقبول صدیقی نے لطیف آباد میں عوامی مسائل کے حوالے سے میڈیا کے نمائندوں کو بریفنگ دیتے ہوئے کیا ۔ اس مو قع پر ایم کیو ایم حیدرآباد کے زونل انچارج نوید شمسی و اراکین زونل کمیٹی ، رکن سندھ تنظیمی کمیٹی و ایم این اے سید وسیم حسین ، اراکین صوبائی اسمبلی راشد خلجی، زبیر احمد خان ، دلاور قریشی ، صابر قائمخانی ، عائشہ آفتاب ، رعنا انصار ، و دیگر ذمہ داران بھی مو جو د تھے ۔ ڈاکٹر خالد مقبول صدیقی نے مزید کہا کہ ایم کیو ایم نے ہمیشہ ملک میں جمہوری حکومتوں کو سپورٹ کیا مگر بدقسمتی سے جمہوری حکومتوں کے ادوار میں متحدہ قومی مو ومنٹ کو ووٹ دینے کی سزا عوام کو دی گئی اور آج سندھ کے شہری علاقوں میں عوام پانی جیسی بنیادی سہولت سے بھی محروم ہیں ۔ انہوں نے کہا کہ اسٹیبلشمنٹ کی منظورِ نظر سیاسی جماعتوں نے ملک میں نفرتوں اور لسانیت کو فروغ دیا۔ انہوں نے کہا کہ ایم کیو ایم نے نفرتوں کا خاتمہ کر کے محبتوں کو فروغ دیا اس کے باوجوداسٹیبلشمنٹ ایم کیو ایم سے ناراض نظر آتی ہے۔ انہوں نے کہا کہ عوام کے مسائل کا حل بلدیاتی انتخابات اور مقامی حکومتوں کے نظام میں ہے جس کے انعقاد کے لیئے ایم کیوایم نے ہمیشہ کو ششیں کی ہیں ماضی میں کراچی اور حیدرآباد میں جو بھی ترقیاتی کا م ہوئے وہ مقامی حکومتوں کے نظام میں حق پرست نمائندوں نے کرائے۔ انہوں نے کہا کہ سندھ حکومت نے ہمیشہ کراچی اور حیدرآباد کے ترقیاتی کاموں کے حوالے سے تعصبانہ رویہ اختیار کیا جس کی بدولت آج حیدرآباد شہر میں صفائی ستھرائی کی صورتحال ابتر ہے، سیوریج کانظام تباہ ہو چکا ہے، پینے کا صاف پانی نایاب ہے اور لوڈ شیڈنگ کا عذاب بھی عوام پر مسلط ہے ۔ انہوں نے مطالبہ کیا کہ صوبائی حکومت حیدرآباد شہرکے لوگوں کو زندہ رہنے کے لیئے فوری طور پر دس ارب روپے کا ترقیاتی پیکیج دے تاکہ شہر کی حالت زار کو بہتر بنایا جا سکے ۔ انہوں نے کہا کہ حق پرست عوامی نمائندوں کی جانب سے قومی و صوبائی اسمبلیوں میں مسلسل آواز بلند کی گئیں اور قرادادیں منظور کرائی گئیں لیکن کو ئی شنوائی نہیں ہوئی اس کے بعد عوامی نمائندوں کے پاس سڑکوں پر آنے کے سوا کوئی چارہ نہیں ہے اس لیئے ایم کیو ایم عوامی مسائل پر احتجاجی تحریک کا آغاز کر چکی ہے اور 05جو ن کو کوہ نور چوک پر پُر امن احتجاجی مظاہرہ کیا جائے گااور احتجاجی مظاہر وں کا یہ سلسلہ اپنے حقوق کے حصول تک جاری رکھیں گے۔
تصاویر