ڈسکہ میں پولیس کے ہاتھوں دووکلاء کی ہلاکت پر الطاف حسین کااظہار افسوس

لندن ۔۔۔25مئی 2015ء

متحدہ قومی موومنٹ کے قائد جناب الطاف حسین نے سیالکوٹ، ڈسکہ میں وکلاء پرپولیس کی فائرنگ کی شدید مذمت کی ہے اور فائرنگ کے نتیجے میں ڈسکہ بار کے صدر خالد عباس سمیت دو وکلاء کے جاں بحق ہونے پر گہرے دکھ اور افسوس کا اظہار کیا ہے ۔ ایک بیان میں جناب الطاف حسین نے کہاکہ کسی بھی مہذب معاشرے میں پولیس کے ہاتھوں پرامن اور بے گناہ شہریوں کے قتل کے واقعات ناقابل قبول ہیں اور قانون نافذ کرنے والے اداروں پر لازم ہے کہ وہ قانون پسندشہریوں پر گولیاں چلانے کے بجائے ان کی جان ومال کاتحفظ یقینی بنائیں ۔ جناب الطاف حسین نے وزیراعظم پاکستان میاں محمد نواز شریف ، وفاقی وزیرداخلہ چوہدری نثارعلی خان اور وزیراعلیٰ پنجاب میاں شہباز شریف سے مطالبہ کیا کہ پولیس کے ہاتھوں وکلاء کے قتل کی فوری تحقیقات کرائی جائے اور شہریوں کی جان ومال کا تحفظ یقینی بنایاجائے۔جناب الطاف حسین نے جاں بحق ہونے والے وکلاء کے سوگوارلواحقین سے دلی تعزیت وہمدردی کا اظہار کرتے ہوئے دعا کی کہ اللہ تعالیٰ جاں بحق وکلاء کو اپنی جوار رحمت میں جگہ عطافرمائے اورسوگوارلواحقین کو یہ صدمہ برداشت کرنے کا حوصلہ دے ۔(آمین)