پشاور میں امامیہ کالونی گلبہار میں بم دھماکہ پر ایم کیوایم کے قائد جناب الطاف حسین کا اظہار مذمت

لندن:۔۔۔28؍مئی2013ء

متحدہ قومی موومنٹ کے قائدجناب الطاف حسین نے پشاورکے علاقے امامیہ کالونی گلبہارمیں بم دھماکہ کی سخت ترین الفاظ میں مذمت کی ہے اوردھماکے کے نتیجے میں متعددافرادکے جاں بحق وزخمی ہونے پردلی افسوس کااظہارکیاہے۔ایک بیان میں جناب الطاف حسین نے دھماکے کوکھلی دہشت گردی قراردیتے ہوئے کہاکہ جودرندہ صفت سفاک دہشت گرداپنے مذموم مقاصدکی تکمیل کیلئے ناحق معصوموں کاخون بہارہے ہیں وہ انسانیت کے کھلے دشمن ہیں ۔جناب الطاف حسین نے بم دھماکے میں جاں بحق افرادکے تمام سوگوارلواحقین سے دلی تعزیت وہمدردی کااظہارکرتے ہوئے دعاکی کہ اللہ تعالیٰ جاں بحق افرادکواپنی جواررحمت میں اعلیٰ مقام عطافرمائے اورتمام زخمیوں کوجلدمکمل صحت یابی عطافرمائے۔جناب الطاف حسین نے صدرمملکت آصف علی زرداری ،نگراں وزیراعظم میرہزارخان کھوسہ،نگراں وفاقی وزیرداخلہ ملک حبیب اورخیبرپختونخواکی نگراں حکومت سے مطالبہ کیاکہ پشاورامامیہ کالونی گلبہارمیں بم دھماکے کافی الفورنوٹس لیاجائے اوردھماکے کے ذمہ دارعناصرکوگرفتارکرکے عبرتناک سزادی جائے۔