ایم کیوا یم کے اراکین سندھ اسمبلی کاکراچی واٹراینڈ سیوریج بورڈ اور کے الیکٹرک کے تنازعہ کے سبب کراچی کو فراہمی آب میں تعطل پر اظہار تشویش

کراچی ۔۔۔6مئی2015ء

متحدہ قومی موومنٹ کے اراکین سندھ اسمبلی نے کراچی واٹر اینڈ سیوریج بورڈ اور کراچی الیکٹرک سپلائی کارپوریشن کے درمیان بقایاجات کی ادائیگی کے تنازعہ کے سبب کراچی کے عوام کو فراہمی آب میں تعطل پر گہری تشویش کا اظہار کیاہے ۔ ایک بیان میں حق پرست ارکان سندھ اسمبلی نے کہا کہ واٹر اینڈ سیوریج بورڈ کو بجلی کی فراہمی معطل ہونے سے پمپنگ اسٹیشنز بند ہوجانے کے سبب کراچی کے عوام کو پانی کی کمی کا عذاب جھیلنا پڑ رہاہے جس کی مکمل ذمہ داری صوبائی حکومت کی ہے اور اس ضمن میں صوبائی حکومت کی جتنی مذمت کی جائے وہ کم ہے۔انہوں نے کہا کہ اٹھارویں آئینی ترمیم کے بعد اور بلدیاتی اداروں کی عدم موجودگی کی صورت میں بجلی کے شعبے کی نگرانی صوبائی حکومت اور صوبائی وزیر بلدیات کی ذمہ داری ہے ۔حق پرست اراکین صوبائی اسمبلی نے وزیر اعظم میاں محمد نواز شریف،وزیر اعلیٰ سندھ سید قائم علی شاہ اور صوبائی وزیر بلدیات سے مطالبہ کیا کہ وہ دونوں اداروں کے درمیان تنازعے کے خاتمے کیلئے اپنا کردار ادا کریں اور پمپنگ اسٹیشنز کو بجلی کی فراہمی یقینی بنائیں تاکہ کراچی کے غریب و مظلوم عوام کو پانی کے بحران کے عذاب سے نکلائیں اور شہر کو بلا تعطل فراہمی آب یقینی بنائیں۔