دہشت گردوں کی فائرنگ سے پشار میں دو خواتین پولیو رضا کاروں کے بہیمانہ قتل پررابطہ کمیٹی کااظہار مذمت
معصوم بچوں کی صحت تباہ کرکے دہشت گردانہیں عمر بھر کیلئے معذوری کی زندگی گزارنے پر مجبور کرنا چاہتے ہیں، رابطہ کمیٹی
شہید پولیو رضاکار خواتین کے تمام سوگوار لواحقین سے رابطہ کمیٹی کااظہار افسوس
لندن۔۔۔28، مئی 2013ء
متحدہ قومی موومنٹ کی رابطہ کمیٹی نے دہشت گردوں کی فائرنگ کے نتیجے میں پشاور کے علاقے بڈھ بیر میں دو خواتین پولیو رضاکاروں کے بہیمانہ قتل کی سخت ترین الفاظ میں مذمت کی ہے اور اس واقعہ کو کھلی دہشت گردی اور بزدلانہ کارروائی قرار دیا ہے ۔ اپنے ایک مذمتی بیان میں رابطہ کمیٹی نے کہاکہ پولیو ٹیم کے رضاکاروں کو فائرنگ کرکے سفاکی سے قتل کرنے والے دہشت گرد فرسودہ روایات پر یقین رکھتے ہیں اور معصوم بچوں کی صحت تباہ کرکے انہیں عمر بھر کیلئے معذوری کی زندگی گزارنے پر مجبور کرنا چاہتے ہیں ۔رابطہ کمیٹی نے دہشت گردوں کی فائرنگ کے نتیجے میں پشاور کے علاقے بڈھ بیر میں شہید ہونے والے دو خواتین پولیو ٹیم کے رضاکاروں کے تمام سوگوار لواحقین سے دلی تعزیت وہمدردی کااظہار کیا اور شہید خواتین کے بلند درجات کیلئے دعا بھی کی ۔رابطہ کمیٹی نے صدر مملکت آصف علی زرداری اور نگراں وزیراعظم میر ہزار خان کھوسو سے مطالبہ کیا کہ پشاور میں پولیو خواتین رضاکاروں کے بہیمانہ قتل کا سنجیدگی سے نوٹس لیاجائے اور اس میں ملوث سفاک دہشت گردوں کوفی الفور گرفتار کرکے قرار واقعی سزا دی جائے ۔