جامعہ کراچی کے اسسٹنٹ پروفیسر ڈاکٹر وحید الرحمن کے قاتلوں کو گرفتارکیا جائے، الطاف حسین

لندن۔۔۔29، اپریل 2015ء 

متحدہ قومی موومنٹ کے قائد جناب الطاف حسین نے دستگیر میں مسلح دہشت گردوں کے ہاتھوں جامعہ کراچی شعبہ ابلاغ عامہ کے اسسٹنٹ پروفیسر ڈاکٹر وحید الرحمن کے بہیمانہ قتل کی سخت ترین الفاظ میں مذمت کی ہے اورمطالبہ کیا کہ ڈاکٹر وحیدالرحمٰن کے سفاک قاتلوں کو گرفتارکرکے قرار واقعی سزا دی جائے ۔ ایک بیان میں جناب الطاف حسین نے کہاکہ اس سے قبل بھی کراچی میں ڈاکٹروں ، پروفیسرز اور زندگی کے دیگر شعبوں کے ماہرین کو ٹارگٹ کلنگ کا نشانہ بناکر شہید کیا جاچکا ہے لیکن آج تک سفاکانہ قتل کی وارداتوں میں ملوث دہشت گردوں کو گرفتارنہیں کیا گیا ۔ ایک جانب کراچی آپریشن کی آڑ میں عوام کی منتخب جماعت ایم کیوایم کو نشانہ بنایاجارہا ہے اور اسکے بے گناہ کارکنوں کو گرفتارکیاجارہا ہے جبکہ دوسری جانب سفاک دہشت گردوں کو شہریوں کی جان ومال سے کھیلنے کی کھلی چھوٹ دے دی گئی ہے جس کی جتنی بھی مذمت کی جائے کم ہے ۔جناب الطاف حسین پروفیسر ڈاکٹر وحید الرحمن کے سوگوار لواحقین سے دلی تعزیت وہمدردی کااظہار کرتے ہوئے کہا کہ دکھ کی اس گھڑی میں مجھ سمیت ایم کیوایم کے تمام کارکنان آپ کے غم میں برابر کے شریک ہیں ۔ انہوں نے دعا کی کہ اللہ تعالیٰ پروفیسر ڈاکٹر وحیدالرحمن کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطا کرے ۔ جناب الطاف حسین نے وزیراعظم نوازشریف ، وفاقی وزیر داخلہ چوہدری نثار علی خان ، وزیراعلیٰ سندھ سید قائم علی شاہ اور گورنر سندھ ڈاکٹرعشرت العباد سے مطالبہ کیا کہ پروفیسر ڈاکٹر وحید الرحمن کے بہیمانہ قتل کا سختی سے نوٹس لیاجائے اور سفاک دہشت گردوں کو فی الفور گرفتار کرکے قرارواقعی سزا دی جائے ۔ 
English