گلستان جوہر بلاک 16سے ایم کیوایم کے نام پر بھتہ مانگنے والے نوید نامی شخص کو موقع پر ہی گرفتا رکرلیا گیا

کراچی ۔۔۔26، مئی 2013ء 

متحدہ قومی موومنٹ کا نام استعمال کرکے بھتہ وصول کرنے والا شخص گلستان جوہر سے گرفتار کرلیا گیا ۔تفصیلات کے مطابق گلستان جوہر بلاک 16میں واقع ہارڈ ویئر کی دکان پر نوید نامی شخص ایم کیوایم کے نام پر دکان کے مالک مطیع اللہ سے ہر ماہ بھتہ وصول کررہا تھا گزشتہ روز بھی نوید نامی شخص ہارڈ ویئر کی دکان پر بھتہ لینے پہنچا تو حق پرست رکن سندھ اسمبلی مزمل قریشی نے اس کی اطلاع مقامی پولیس کو دی اور پولیس نے موقع پرپہنچ کر نوید نومی شخص کو گرفتار کرلیا ۔دریں اثناء متحدہ قومی موومنٹ نے ایک مرتبہ پھر واضح کیا ہے کہ ایم کیوایم نے ہر قسم کے چندے پر پابندی عائد کررکھی ہے اور جو عناصر ایم کیوایم کا نام استعمال کرکے تاجروں ، دکانداروں اور صنعتکاروں سے بھتہ وصولی کررہے ہیں وہ ایم کیوایم کا امیج خراب کرنے گھناؤنی سازش کا حصہ ہے ۔ رابطہ کمیٹی نے عوام سے اپیل کی کہ وہ ایم کیوایم کے نام پر کسی بھی قسم کا چندہ مانگنے والے عناصر سے ہوشیار رہیں اور اس کی اطلاع اپنے قریبی پولیس اسٹیشن کو دیں اور ایم کیوایم کے مرکز نائن زیرو فون کرکے مطلع کر سکتے ہیں۔