اوچ پاور پلانٹ کو گیس کی سپلائی معطل ہونے کے سبب نیشنل سسٹم میں بجلی کی کمی پر نومنتخب حق پرست اراکین صوبائی اسمبلی کااظہار تشویش
ملک بھر میں پہلے ہی بجلی کا شدید بحران ہے ،اب ایسا محسوس ہوتا ہے کہ نیشنل سسٹم میں بجلی کی کمی کے اثرات بھی عوام کو ہی جھیلنے ہونگے ، نومنتخب حق پرست اراکین صوبائی اسمبلی
اوچ پلاورپلانٹ کو گیس کی فراہمی کیلئے ہر سطح پر مثبت اقدامات بروئے کار لائے جائیں ، صدر اور نگراں وزیراعظم سے مطالبہ
کراچی ۔۔۔26، مئی 2013ء
متحدہ قومی موومنٹ کے نومنتخب حق پرست اراکین صوبائی اسمبلی نے اوچ گیس فیلڈ میں کمپریسر ٹرپ کرجانے کے باعث اوچ پاور پلانٹ کو گیس کی سپلائی معطل ہونے اور نیشنل سسٹم میں 550میگاواٹ بجلی کی کمی پر گہری تشویش کااظہار کیا ہے ۔ اپنے مشترکہ بیان میں انہوں نے کہاکہ ملک بھر میں پہلے ہی بجلی کا شدید بحران ہے اور بجلی کی غیر اعلانیہ اور طویل دورانیہ کی لوڈشیڈنگ نے عوام کی زندگی اجیرن بنا رکھی ہے ۔ انہوں نے کہا کہ ایسا محسوس ہوتا ہے کہ ملک میں بجلی کے شدید بحران کے باوجود اوچ پاور پلانٹ کو گیس کی سپلائی معطل ہونے کے سبب نیشنل سسٹم میں بجلی کی کمی کے اثرات بھی عوام کو ہی جھیلنے ہونگے جس کی جتنی بھی مذمت کی جائے وہ کم ہے ۔ نومنتخب حق پرست اراکین صوبائی اسمبلی نے صدر مملکت آصف علی زرداری اور نگراں وزیراعظم میر ہزار خان کھوسو سے مطالبہ کیا کہ اوچ پاور پلانٹ کو گیس کی سپلائی معطل ہونے کے سبب نیشنل سسٹم میں بجلی کی کمی کا فی الفور نوٹس لیاجائے اور اوچ پلاورپلانٹ کو گیس کی فراہمی کیلئے ہر سطح پر مثبت اقدامات بروئے کار لائے جائیں ۔