پاکستان میں اعتدال پسندسیاسی جماعتوں کے خلاف دہشت گردوں کے حملوں کے خلاف ایم کیوایم کے زیراہتمام لندن میں برطانوی وزیراعظم کی رہائشگاہ 10ڈاؤننگ اسٹریٹ پر احتجاجی مظاہرہ

لندن ۔۔۔ 9 مئی 2013ء

پاکستان میں ایم کیوایم اوردیگراعتدال پسندسیاسی جماعتوں کے خلاف دہشت گردوں کے حملوں کے خلاف متحدہ قومی موومنٹ کے زیراہتمام آج لندن میں برطانوی وزیراعظم کی رہائشگاہ 10ڈاؤننگ اسٹریٹ پر احتجاجی مظاہرہ کیاگیا۔ مظاہرے میں ایم کیوایم یوکے کے عہدیداروں اورکارکنوں کی بڑی تعدادنے شرکت کی ۔ مظاہرین نے اپنے ہاتھوں میں ایم کیوایم اورپاکستان کے پرچم اور جناب الطاف حسین کے پورٹریٹ کے علاوہ مختلف پلے کارڈز اٹھارکھے تھے جن پر کراچی، سندھ، خیبرپختونخوا اوربلوچستان میں دہشت گردوں کی جانب سے ایم کیوایم ، اے این پی اورپیپلزپارٹی کے دفاترپر بموں کے حملوں،امیدواروں، رہنماؤں اورکارکنوں کی ٹارگٹ کلنگ اوردہشت گردی کی دیگرکارروائیوں کے خلاف No to terrorism,۔۔۔ down with terrorism۔۔۔ we for democracy اوردیگر کلمات درج تھے ۔مظاہرین نے ’’ بندکرو، بندکرو۔۔۔دہشت گردی بندکرو‘‘ ، ’’ نامنظور ، نامنظور۔۔۔طالبانائزیشن نامنظور ‘‘ اوردیگرنعرے لگائے۔ اس موقع پر ایم کیوایم یوکے کے آرگنائزرڈاکٹرسلیم دانش نے مظاہرین سے خطاب کرتے ہوئے کہاکہ پاکستان میں ایم کیوایم اوردیگراعتدال پسندسیاسی جماعتوں کومذہبی انتہاپسنددہشت گردوں کی جانب سے کھلی دہشت گردی کانشانہ بنایاجارہاہے،ہمارے دفاترپر بموں سے حملے کئے جارہے ہیں اورکارکنوں کوشہیدکیاجارہاہے لیکن نگراں حکومت اورسیکوریٹی فورسز ہمیں تحفظ فراہم نہیں کررہی ہیں۔ انہوں نے کہاکہ ایم کیوایم کے رہنماؤں، کارکنوں اورہمدردں کایہ عزم ہے کہ چاہے کتنی ہی دہشت گردی کرلی جائے لیکن ہم دہشت گردی کے آگے سرینڈرنہیں کریں گے۔ اس موقع پر ایم کیوایم یوکے کے جوائنٹ آرگنائزرفیض احمد،آرگنائزنگ کمیٹی کے ارکان سہیل خانزادہ،ہاشم اعظم اوردیگرنے بھی خطاب کیا۔