لبرل ازم کو امریکہ کی غلامی قراردینے والے اللہ تعالیٰ اور نبی کریم ؐ کی تعلیمات کی خلاف ورزی کررہے ہیں، محمد انور
اللہ تعالیٰ، نبی آخرالزماںؐ ، اہل بیت اور صحابہ کرامؓ کی تعلیمات پر چلنے والوں کو امریکہ کا غلام قراردینا اسلامی تعلیمات کی خلاف ورزی ہے
قرآن مجید میں ایسے ہی منافقین پر لعنت بھیجی گئی ہے اورانہیں زمین پرفسادپیدا کرنے والا قراردیا گیا ہے
لندن۔۔۔7،مئی 2013ء
متحدہ قومی موومنٹ کی رابطہ کمیٹی کے رکن محمد انورنے کہاہے کہ لبرل ازم کو امریکہ کی غلامی قراردینے والے اللہ تعالیٰ اور نبی کریم ؐ کی تعلیمات کی خلاف ورزی کررہے ہیں۔ ایک بیان میں انہوں نے کہاکہ احترام انسانیت، مذہبی رواداری ،فرقہ وارانہ ہم آہنگی اور اخوت، محبت اور بھائی چارے کی بات کرنا امریکہ کی غلامی نہیں بلکہ حکم الہی اور نبی آخرالزماںؐ ، اہل بیت اور صحابہ کرامؓ کی تعلیمات ہیں اور جوعناصران تعلیمات پر چلنے والوں کو امریکہ کا غلام قراردے رہے ہیں وہ نہ صرف اسلامی تعلیمات کی خلاف ورزی کررہے ہیں بلکہ پاکستان کے سادہ لوح عوام کو گمراہ بھی کررہے ہیں اورقرآن مجید میں ایسے ہی منافقین پر لعنت بھیجی گئی ہے اورانہیں زمین پرفسادپیدا کرنے والا قراردیا گیا ہے ۔محمد انور نے کہاکہ قرآن مجیدمیں اللہ تعالیٰ فرماتاہے کہ ’’ تمہارا دین تمہارے ساتھ ، میرادین میرے ساتھ‘‘، ایک اورجگہ ارشادباری تعالیٰ ہے کہ ’’ دین میں کوئی جبرنہیں‘‘۔ قرآن مجیدکی تعلیمات کے مطابق قائد تحریک جناب الطاف حسین بھی تمام مذاہب اور تمام مکاتب فکرسے تعلق رکھنے والوں کو ایک دوسرے کے احترام کا درس دے رہے ہیں اوریہی لبرل ازم ہے ۔محمد انور نے چیف الیکشن کمیشن آف پاکستان سے مطالبہ کیا کہ پاکستان کے معصوم عوام کوگمراہ کرنے اور دین اسلام کی تعلیمات کی خلاف ورزی کرنے والی جماعت کے نمائندوں کو نااہل قراردیا جائے اوراس جماعت کے الیکشن لڑنے پر پابندی عائد کی جائے ۔