پاپوش نگر میں ایم کیوایم کے الیکشن آفس کے قریب دہشت گردوں کی اندھا دھند فائرنگ سے کارکن عادل کے سفاکانہ قتل پر رابطہ کمیٹی کااظہار مذمت

کراچی۔۔۔03، مئی 2013ء 

متحدہ قومی موومنٹ کی رابطہ کمیٹی نے کراچی کے علاقے پاپوش نگر میں ایم کیوایم کے الیکشن آفس کے قریب دہشت گردوں کی اندھا دھند فائرنگ سے ایم کیوایم ناظم آباد سیکٹر یونٹ 181کے کارکن عادل کے بہیمانہ قتل کی سخت ترین الفاظ میں مذمت کی ہے اور دہشت گردی کے اس واقعہ کو ایم کیوایم کی انتخابی مہم روکنے اور شہر کا امن سبوتاژ کرنے کی گھناؤنی سازشوں کا تسلسل قرار دیا ہے ۔ اپنے ایک مذمتی بیان میں رابطہ کمیٹی نے کہاکہ نام نہاد انتہاء پسند جماعتیں جمہوریت کی آڑ میں انتخابی عمل پر دہشت گردی اور قتل و غارتگری کے ذریعے اثر انداز ہورہی ہیں اور ملک کے لبر ل ، اعتدال پسند اور روشن خیال عوام کے آئینی و قانونی حقوق سلب کرکے ملک پر انتہاء پسندوں اور رجعت پسند دہشت گردوں کا قبضہ کرانا چاہتی ہیں جس کی جتنی بھی مذمت کی جائے وہ کم ہے ۔ رابطہ کمیٹی نے عادل شہید کے تمام سوگوارلواحقین سے دلی تعزیت وہمدردی کااظہار کرتے ہوئے انہیں صبر کی تلقین کی اور دعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔ رابطہ کمیٹی نے نگراں حکومت سے مطالبہ کیا کہ پاپوش نگر میں ایم کیوایم کے الیکشن آفس کے قریب دہشت گردوں کی فائرنگ اور اس کے نتیجے میں کارکن عادل کی شہادت کا سنجیدگی سے نوٹس لیاجائے ، دہشت گردی اور قتل و غارتگری کے ذریعے ایم کیوایم کو انتخابی مہم سے روکنے کا غیر جمہوری ، غیر آئینی و قانونی عمل فی الفور بندکرایاجائے اور پرامن انتخابات کے انعقاد کیلئے انتخابی عمل کو سبوتاژ کرنے میں ملوث ایک ایک دہشت گرد اور ان کے سرپرستوں کے خلاف کارروائی کرکے فی الفور گرفتار کیاجائے اور انہیں عبرتناک سزا دی جائے ۔