ایم کیوایم اور دیگر جماعتوں کو انتخابی عمل سے دور رکھنے کے خلاف امریکہ کے تمام بڑے شہروں میں 4 مئی کو احتجاجی مظاہرے کئے جائیں گے

واشنگٹن ڈی سی ۔۔۔۔30، اپریل 2013ء

ایم کیو ایم امریکہ کے سینٹرل آرگنائزر جنید فہمی کی سربراہی میں ایک ہنگامی اجلاس منعقد ہوا جس میں سینٹرل آرگنائزنگ کمیٹی کے جوائنٹ آرگنائزرز محمد ارشد حسین اور ندیم صدیقی سمیت اراکین سینٹرل آرگنائزنگ کمیٹی نے شرکت کی۔ اجلاس میں ملک میں دہشت گردی کے ذریعے لبرل اور معتدل سیاسی جماعتوں کو انتخابات میں حصہ لینے سے روکنے کے خلاف آئندہ کے لائحہ عمل پر غور کیا گیا ۔ اجلاس کے شرکاء سے خطاب کرتے ہوئے ر جنید فہمی نے کہا کہ ایک منظم اور سوچی سمجھی سازش کے تحت متحدہ قومی موومنٹ، پاکستان پیپلز پارٹی اور عوامی نیشنل پارٹی کو انتخابی عمل سے باہر رکھنے کی کوشش کی جارہی ہے اور دائیں بازو کی جماعتوں کو اقتدار میں لانے کے لئے ہر طرح کی سپورٹ فراہم کی جارہی ہے۔ انہوں نے کہا کہ انتخابات کے دوران دہشت گردی کاماحول جاری ہے اور اسے پرامن بنانے کے کوئی اقدامات نہیں کئے جارہے ہیں جس کے باعث ہمیں خدشہ ہے کہ نگران حکومت، الیکشن کمیشن آف پاکستان اور دہشت گردوں کا مقصد ایک ہی ہے۔اجلاس میں فیصلہ کی گیا کہ ایم کیو ایم اور دیگر جماعتوں کو انتخابی عمل سے دور رکھنے کے خلاف امریکہ کے تمام بڑے شہروں میں4 مئی بروز ہفتہ احتجاجی مظاہرے کئے جائیں گے ۔ انہوں نے تمام پاکستانیوں سے اپیل کی کہ بم دھماکوں کے خلاف ، معصوم و بے گناہ انسانوں کے خون سے کھیلی جانے والی ہولی اور دہشت گردی کے ذریعے لبرل اور معتدل سیاسی جماعتوں کو انتخابات میں حصہ لینے سے روکنے کے خلاف، روشن خیالی اور امن پسندی کی آواز کو بچانے کے لئے احتجاجی مظاہروں میں بھر پور حصہ لیں اور ثابت کردیں کہ پاکستان کی لبرل، معتدل اور روشن خیال قوتیں ابھی زندہ ہیں اور ان کے حوصلے بلند ہیں ۔