ایم کیوایم قصبہ کالونی یونٹ 132 کے دفتر اور قصبہ کالونی میں واقع مسجد وامام بارگاہ علی رضا پر ہونے والے بم دھماکوں کے خلاف ایم کیوایم کی رابطہ کمیٹی کی اپیل پر سندھ بھر میں پرامن یوم سوگ منایا گیا

کراچی ۔۔۔28، اپریل 2013ء 

ہفتہ کی شب ایم کیوایم قصبہ کالونی یونٹ 132 کے دفتر اور قصبہ کالونی میں واقع مسجد وامام بارگاہ علی رضا پر ہونے والے بم دھماکوں اور اس میں ایم کیوایم کو نشانہ بنانے کے خلاف اتوار کے روز ایم کیوایم کی رابطہ کمیٹی کی اپیل پر سندھ بھر میں پرامن یوم سوگ منایا گیا ۔ یوم سوگ کے سلسلے میں تاجروں ، صنعتکاروں، دکانداروں ، ٹرانسپورٹروں نے رضاکارانہ طور پر اپنی سرگرمیاں معطل رکھیں اور دہشت گردی اور انتہاء پسندی کے خلاف ایم کیوایم سے بھر پور یکجہتی کااظہار کیا ۔یوم سوگ کے موقع پر ملک بھر میں ایم کیوایم کے دفاتر پر قرآن خوانی اور فاتحہ خوانی کے اجتماعات منعقد ہوئے جن میں ذمہ داران و کارکنان نے بڑی تعداد میں شرکت کی اور شہداء کو زبردست زبردست خراج عقیدت پیش کیا ۔اس موقع پر سیاہ پرچم لہرائے گئے ، کارکنان نے بازوں پر سیاہ پٹیاں باندھی جبکہ سیاہ بینرز بھی آویزاں کئے گئے جن پر دہشت گردی ، بم دھماکے خلاف کارروائی کے مطالبات کے علاوہ مذمتی کلمات بھی تحریر تھے ۔ قرآن خوانی کے اجتماعات میں شہداء کے بلند درجات ، لواحقین کیلئے صبر جمیل ، دہشت گردی ، انتہاء پسندی کے خاتمے ، اس کے خلاف مضبوط اتحاد ، ایم کیوایم کو آزادانہ طریقے سے الیکشن میں حصہ لینے سے روکنے کیلئے دہشت گردی اور بم دھماکوں کے پیچھے کارفرما عوامل کی سازشوں کی ناکامی، ایم کیوایم کی حق پرستانہ جدوجہد کی کامیابی کے علاوہ قائد تحریک جناب الطاف حسین کی درازی عمر ، صحت و تندرستی اور ناگہانی آفات سے بچاؤ کیلئے خصوصی دعا کی گئیں ۔