بم دھماکوں کے ذریعہ ملک کو غیرمستحکم کرنے کی سازش کی جارہی ہے، الطاف حسین

ؒ لندن۔۔۔23، اپریل2013ء

متحدہ قومی موومنٹ کے قائد جناب الطاف حسین نے کوئٹہ میں یکے بعد دیگرے تین دھماکوں پر گہری تشویش کا اظہارکیا ہے اور بم دھماکوں میں متعدد افراد کے زخمی ہونے پر دلی افسوس کا اظہارکیا ہے ۔ ایک بیان میں جناب الطاف حسین نے کہاکہ بم دھماکوں کے ذریعہ ملک کو غیرمستحکم کرنے کی سازش کی جارہی ہے اور جو دہشت گرد عناصر اپنے گھناؤنے مقاصد کے تحت بے گناہ شہریوں کی جان ومال سے کھیلنے کی کوشش کررہے ہیں وہ پاکستان اور انسانیت کے کھلے دشمن ہیں ۔ جناب الطاف حسین نے صدرآصف علی زرداری ، نگراں وزیراعظم میرہزار خان کھوسہ اور نگراں وفاقی وزیرداخلہ ملک حبیب سے مطالبہ کیا کہ کوئٹہ میں بم دھماکوں کا فوری نوٹس لیاجائے ، بم دھماکوں میں ملوث عناصر کے خلاف سخت ترین کارروائی کی جائے اور شہریوں کی جان ومال کے تحفظ کیلئے مزید ٹھوس اور مثبت اقدامات کئے جائیں ۔ جناب الطاف حسین نے کوئٹہ میں بم دھماکوں کے نتیجے میں زخمی ہونے والے افراد کی جلد ومکمل صحت یابی کیلئے دعا بھی کی ۔