ایم کیوایم کے قائد جناب الطاف حسین کا صدر مملکت آصف علی زرداری سے ٹیلی فون پر رابطہ

لندن۔۔18اپریل 2013ء

متحدہ قومی موومنٹ کے قائد جناب الطاف حسین نے جمعرات کی شام صدر مملکت آصف علی زرداری سے فون پر گفتگو کی اور انہیں ایم کیوایم کے خلاف جاری دہشت گردی کی کارروائیوں ،بالخصوص ایم کیوایم کے کارکنوں کی شہادت کے واقعات سے آگاہ کیا ۔انہوں نے صدر مملکت کو محمودآباد میں دہشت گر دوں کے ہاتھوں ایم کیوایم کے جوائنٹ یونٹ انچار ج محمد فیصل کے سفاکانہ قتل کی تفصیلات سے آگا کر تے ہوئے بتایا کہ ایم کیوایم تما م تر اشتعال انگیز یوں کے باوجود ملک او ر جمہوریت کے مفاد میں انتہائی صبر وتحمل کامظاہر ہ کر رہی ہے۔انہوں نے صدر مملکت کو بتایا کہ ایم کیوایم نے محمد فیصل سمیت اپنے کارکنوں کے قتل پر جمعہ کو پرامن سوگ کا اعلان کیا ہے تاہم عوام سے کاروبار اور ٹرانسپورٹ جاری رکھنے کی اپیل کی ہے ۔ صدرمملکت نے ایم کیوایم کے کارکنوں کی شہادت پر دلی افسوس کا اظہار کر تے ہوئے کہا کہ ایم کیوایم ان اشتعال انگیزیوں پر جس تحمل کا مظاہر ہ کر رہی ہے وہ قابل ستائش ہے۔انہوں نے کہا کہ خود پیپلز پارٹی کو بھی دہشت گردی کا سامنا ہے اور آج بھی پنجاب میں اسکے انتخابی دفتر پر حملہ کیا گیا ہے جبکہ گذشتہ دنوں اسکے متعدد کارکنوں کو ہلاک بھی کیا گیا ہے ۔ انہوں نے جناب الطاف حسین سے کہا کہ ہم نے ساتھیوں کی مدد سے ماضی میں بھی نامساعد حالات کا سامنا کیا ہے اور آئندہ بھی دوستوں کے ساتھ ملکر حالات کامقابلہ کریں گے ۔دونوں رہنماؤں نے ایک دوسرے کی خیریت دریافت کی اور ایک دوسرے کیلئے نیک خواہشات کا اظہار بھی کیا۔