آزادی صحافت کے غلط استعمال اور میڈیا ٹرائل کے خلاف ، ایم کیو ایم کا کراچی میں نجی ٹی وی چینل کے سامنے بڑا احتجاجی مظاہرہ

کراچی ۔۔۔26مارچ2015ء

ایم کیو ایم کے زیر اہتمام آزادی صحافت کے غلط استعمال اور ایم کیو ایم کے میڈیا ٹرائل پر صدر میں واقع نجی ٹی وی چینل کے دفتر کے باہر بڑا احتجاجی مظاہرہ کیا گیا جس میں ایم کیو ایم کی رابطہ کمیٹی کے جوائنٹ انچارج ڈاکٹر نصرت شوکت، کہف الوریٰ، اراکین رابطہ کمیٹی ڈاکٹر محمد فاروق ستار،سید حیدر عباس رضوی، عارف خان ایڈوکیٹ، عظیم فاروقی،آنسہ ممتاز انور ،سینٹرل ایگزیکٹو کونسل کے ارکان، حق پرست سینیٹر زتنویر الحق تھانوی،خوش بخت شجاعت،محترمہ نگہت مرزا حنا،ارکان قومی و صوبائی اسمبلی، دانشوروں ، قلمکاروں، خواتین ، بزرگوں ، بچوں ، نوجوانوں ،طالب علموں، تنظیمی شعبہ جات کے مرکزی و ذیلی ذمہ داران اور مختلف علاقوں سے تعلق رکھنے والے کارکنان سمیت مختلف شعبہ ہائے زندگی سے تعلق رکھنے والے افراد نے لاکھوں کی تعداد میں شرکت کرکے نجی ٹی وی چینل کے غیر ذمہ دارانہ رویے کر احتجاج ریکارڈ کرایا۔اس موقع پر شرکاء احتجاج نے اپنے ہاتھوں میں احتجاجی بینرز اور پلے کارڈز تھامے ہوئے تھے جن پر سپوت گھٹیا خاندان۔۔۔مبشر لقمان، درباری صحافت نا منظور۔۔۔بازاری صحافت نامنظور،میڈیا رہو ۔۔۔عدالت نہ بنو،We Want Justice، Down With ARY،آزادئ اظہار یا شتر بے مہارسمیت دیگر نعرے درج تھے جبکہ مظاہرین وقتا فوقتاً نجی ٹی چینل کے متعصب اینکر پرسن کے خلاف اور ایم کیو ایم کے قائد جناب الطاف حسین کے حق میں فلک شگاف نعرے بلند کرتے رہے۔احتجاجی مظاہرے میں شریک خواتین نے اس موقع پر مطالبہ کیا کہ ایم کیو ایم کا میڈیا ٹرائل فی الفور بند کیا جائے اور جناب الطاف حسین کے خلاف ہرزہ سرائی کرنے والے متعصب اینکر پرسنزو تجزیہ نگاروں کے خلاف تادیبی کارروائی کی جائے۔ احتجاجی مظاہرے کے موقع زیب النساء اسٹریٹ سے نجی ٹی وی چینل کے دفتر، اطراف میں قائم تجارتی مراکز اور چوراہوں پر عوام کا سمندر ، تاجر برادری کے جناب الطاف حسین کے حق میں نعرے اور اطراف کی سڑکوں تک عوام کا ٹھاٹھے مارتا سمندرتھا۔