سرکاری اہلکاروں کے ایم کیوایم نیو کراچی سیکٹر کے انچارج علی رضا ولد شمیم رضا کی گلستان جوہر میں واقع عارضی رہائشگاہ پر غیر قانونی چھاپے اور بلاجواز گرفتاری پر ایم کیوایم رابطہ کمیٹی کااظہار مذمت

کراچی ۔۔۔19، مارچ2015ء 

متحدہ قومی موومنٹ کی رابطہ کمیٹی نے سرکاری اہلکاروں کی جانب سے ایم کیوایم نیو کراچی سیکٹر کے انچارج علی رضا ولد شمیم رضا کی گلستان جوہر میں واقع عارضی رہائشگاہ پر غیر قانونی چھاپے اور ان کی بلاجواز گرفتاری کی سخت ترین الفاظ میں مذمت کی ہے اور کہا ہے کہ چھاپے و گرفتاریوں اور جھوٹے مقدمات میں ایم کیوایم کے کارکنان و ذمہ داران کو ملوث کرکے حوصلے کمزور نہیں کئے جاسکتے اور نہ ہی انہیں حق پرستی کی جدوجہد سے باز رکھا جاسکتا ہے ۔ ایک بیان میں رابطہ کمیٹی نے کہاکہ 18مارچ اور 19مارچ کی درمیانی شب سرکاری اہلکاروں نے علی رضا کی گلستان جوہر میں عارضی رہائشگاہ پر چھاپہ مارا اور ان کو گرفتار کرکے ہمراہ لے گئے اور نامعلوم مقام پر منتقل کردیا ۔ رابطہ کمیٹی نے کہاکہ سرکاری اہلکار ایم کیوایم کے ذمہ داران و کارکنان کو بلاجواز گرفتار کررہے ہیں ، انہیں تشدد کانشانہ بنا رہے ہیں اور سرکاری حراست میں بہیمانہ تشدد کا نشانہ بناکرمختلف جرائم کے اقبالی بیانات دینے پرمجبور کررہے ہیں اور خدشہ ہے کہ علی رضا کو بھی سرکاری حراست میں بہیمانہ تشددکا نشانہ بنایاجارہا ہے اور ان کی جان کو بھی شدید خطرات لاحق ہیں ۔ رابطہ کمیٹی نے کہاکہ چند جرائم پیشہ افراد کی آڑ میں کروڑوں عوام کی جماعت ایم کیوایم کو سرکاری اہلکاروں کی جانب سے جس طرح سے نشانہ بنایاجارہا ہے اس سے صاف ظاہر ہوتا ہے کہ ایم کیوایم کا میڈیا ٹرائل کیاجارہا ہے اور اسے ایک مرتبہ پھر پرامن جماعت کے بجائے جرائم پیشہ افراد پر مشتمل جماعت بنا کر پیش کیاجارہا ہے اور اس کا امیج دنیا بھر میں خراب کیاجارہا ہے ۔رابطہ کمیٹی نے کہاکہ سرکاری حراست میں ایم کیوایم کے ذمہ داران و کارکنان کو وحشیانہ تشدد کا نشانہ بنایاجارہا ہے اور انسانی حقوق سمیت ایم کیوایم کے جمہوری اور سیاسی حقوق بری طرح سے پامال کئے جارہے ہیں اور ایسے دیوار سے لگانے کا مذموم عمل کیاجارہا ہے جس کی جتنی بھی مذمت کی جائے کم ہے ۔ رابطہ کمیٹی نے کہاکہ چھاپے و گرفتاریاں اور ظلم و جبر کے ہتھکنڈے ماضی میں بھی ایم کیوایم کے ذمہ داران و کارکنان جھیل چکے ہیں اور ایم کیوایم کے خلاف تمام تر گھناؤنی سازشوں اور جھوٹے مقدمات کے باوجود کارکنان آج بھی ثابت قدم ہیں اور قائد تحریک جناب الطاف حسین کی قیادت میں اپنی پرامن ، آئینی و قانونی اور عدالتی جدوجہد جاری رکھیں گے ۔رابطہ کمیٹی نے وزیراعظم نواز شریف ، وفاقی وزیر داخلہ چوہدری نثار علی خان ، گورنر سندھ ڈاکٹر عشرت العباد اور وزیر اعلیٰ سندھ سید قائم علی شاہ سے مطالبہ کیا کہ ایم کیوایم نیو کراچی سیکٹر کے انچارج علی رضا ولد شمیم کی سرکاری اہلکاروں کے ہاتھوں بلاجواز گرفتار ی کا سختی سے نوٹس لیاجائے ، ایم کیوایم کے خلاف چھاپے و گرفتاریوں کا سلسلہ بند کرایاجائے اور علی رضا سمیت تمام گرفتار شدگان کے سیاسی ، آئینی ، قانونی اور انسانی حقوق کو تحفظ فراہم کرکے انہیں فی الفور رہاکیاجائے ۔
English