نارتھ ناظم آباد بلاک میں نجی اسکول پر دہشت گردوں کے کریکر حملہ پر ایم کیوایم رابطہ کمیٹی کااظہار مذمت

کراچی ۔۔۔18، مارچ2015ء 

متحدہ قومی موومنٹ کی رابطہ کمیٹی نے نارتھ ناظم آباد بلاک Bمیں نجی اسکول پر دہشت گردوں کے کریکر حملہ کی سخت ترین الفاظ میں مذمت کی ہے اور مطالبہ کیا ہے کہ کراچی میں اسکولوں پر حملہ کرنے میں ملوث دہشت گردوں کو فی الفور گرفتار کیاجائے ۔ ایک بیان میں رابطہ کمیٹی نے کہاکہ شہر میں اس سے قبل بھی نجی اسکولو ں کو کریکر سے حملے بم سے کرکے نشانہ بنایاجاتا رہا ہے لیکن آج تک ان میں ملوث کسی بھی دہشت گرد کو گرفتار نہیں کیا جاسکا ہے ۔ رابطہ کمیٹی نے کہاکہ دہشت گردوں کا شہر میں نجی اسکولوں کو تسلسل کے ساتھ نشانہ بنانا اس بات کاثبوت ہے کہ دہشت گرد اپنے آپ کو قانون سے ماورا تصور کرتے ہیں اور بلاخوف و خطر تعلیمی اداروں پر حملے کرکے فرار ہونے میں کامیاب ہوجاتے ہیں ۔ رابطہ کمیٹی نے کہاکہ اگر نجی اسکولوں پر حملے میں ملوث دہشت گردوں کی گرفتاری کیلئے جامع حکمت عملی کے تحت کام کیاجاتا اور ان کی گرفتاریاں کی جاتی تو آج نارتھ ناظم آباد بلاک Bمیں نجی اسکول پرکریکر حملہ کا افسوسناک واقعہ نہ ہوتا اور دہشت گرد اپنی علم دشمن کارروائیوں میں کبھی کامیاب نہیں ہوتے ۔ رابطہ کمیٹی نے گورنر سندھ ڈاکٹر عشرت العباد اور وزیر اعلیٰ سندھ سید قائم علی شاہ سے مطالبہ کیا کہ نارتھ ناظم آباد بلاک Bمیں واقع نجی اسکول پر کریکر حملہ کا سختی سے نوٹس لیاجائے اور تعلیمی اداروں پر حملے کرکے علم سے دور رکھنے کی ناپاک کوششیں کرنے والے دہشت گردوں کا سخت محاسبہ کرکے عبرتناک سزا دی جائے ۔ 

دریں اثناء حق پرست رکن سندھ اسمبلی رؤف صدیقی نے نجی اسکول پر کریکر حملہ کی اطلاع ملتے ہی جائے وقوعہ کا دورہ کیا اور اس عملے سے کریکر دھماکہ کی تفصیلات معلوم کیں ۔ اس موقع پر ایم کیوایم کے ذمہ دارا ن و کارکنان بھی ان کے ہمراہ تھے ۔ رؤف صدیقی نے دورے کے موقع پر اسکول پر کریکر بم حملے کو علم دشمن عناصر کی بد ترین کارروائی قرار دیتے ہوئے انہیں فی الفور گرفتار کرنے کا مطالبہ بھی کیا ۔ 
English Viewers