سانحہ بلدیہ ٹاؤن کی ایماندارانہ تحقیقات کرائی جائے، الطاف حسین

لندن۔۔۔21، فروری2015ء

متحدہ قومی موومنٹ کے قائد جناب الطاف حسین نے آرمی چیف سے پرزوراپیل کی ہے کہ سانحہ بلدیہ ٹاؤن کی ایماندارانہ تحقیقات کرائی جائے ۔ ایک بیان میں جناب الطاف حسین نے چیف آف آرمی اسٹاف جنرل راحیل شریف کو مخاطب کرتے ہوئے کہاکہ مجھے اس بات کا اچھی طریقے سے احساس ہے کہ ایک طرف آپ ضرب عضب کے ذریعہ ملک کو دہشت گردوں سے پاک کرنے کے عمل میں دن رات مصروف ہیں، دوسری طرف والدہ محترمہ کی جدائی کا تازہ تازہ زخم بھی آپ کے ذہن ودل پر لگا ہوا ہے اور آپ انتہائی مغموم ہیں۔ جناب الطاف حسین نے کہاکہ میں ایک مرتبہ پھر دعا گو ہوں کہ اللہ تعالیٰ آپ کی مرحومہ والدہ محترمہ کو کروٹ کروٹ جنت الفردوس عطا کرے اورآپ کو یہ عظیم صدمہ برداشت کرنے کا حوصلہ عطا فرمائے ۔ جناب الطاف حسین نے کہاکہ آپ کی ان تمام پریشانیوں کے باوجود میں آپ کو اللہ تعالیٰ اور اس کے رسول ؐ کا واسطہ دیکر آپ سے انصاف کا طلبگار ہوں کہ 11، ستمبر2012ء کو بلدیہ ٹاؤن میں ایک گارمنٹ فیکٹری علی انٹرپرائز میں ایسی خوفناک آگ لگی کہ سب کچھ اس آگ کی نذر ہوگیا حتیٰ کہ ڈھائی سو سے زائد محنت کش مزدورمرد، عورت اور بزرگ بھی اس آگ میں جل کر خاکستر ہوگئے لیکن آج تک اس واقعہ کی ایماندارانہ طریقے سے تحقیقات نہیں کی گئی ۔ جناب الطاف حسین نے چیف آف آرمی اسٹاف جنرل راحیل شریف سے پرزور اپیل کی کہ آپ آرمی کے تین ایسے اشخاص جن کے کرداروگفتاروعمل پر آرمی کے ایک ایک فرد کو اعتبار ہو ، ایسے افراد پر مبنی ایک تحقیقاتی کمیٹی تشکیل دیکر 11، ستمبر2012ء کو علی انٹرپرائز نامی فیکٹری میں لگنے والی آگ کی اصل تحقیقات کرائیں اور تحقیقات کرنے والے لمحہ بہ لمحہ ہونے والی تفتیش کے عمل سے آپ کو بھی آگاہ رکھیں۔ جناب الطاف حسین نے کہاکہ ڈھائی سو سے زائد معصوم انسانوں کو جلاکر خاکستر کرنے کے عمل میں جوجو سفاک درندے ملوث پائے جائیں ان عناصر کو نشان عبرت بنانے کیلئے فیکٹری کے سامنے اسپیشل چوک بناکر وہاں لٹکایا جائے اور کئی دن تک ان کی لاشیں وہاں لٹکا کر رکھی جائیں تاکہ نشان عبرت کا منظردیکھنے والی ہرآنکھ عبرت حاصل کرے اور کوئی بھی اس قسم کے گھناؤنے اقدام کا تصور بھی نہ کرسکے ۔
English Viewers
وڈیو