دیہی علاقوں سمیت ملک بھر کے تعلیمی اداروں میں حفاظتی انتظامات کو مزید بہتر بنایا جائے، الطاف حسین

لندن۔۔۔3،فروری2015ء

متحدہ قومی موومنٹ کے قائد جناب الطاف حسین نے عبداللہ گورنمنٹ گرلزکالج اور مختلف تعلیمی اداروں میں دہشت گردوں کی جانب سے دھمکی آمیز خطوط ملنے پر گہری تشویش کااظہار کیاہے ۔ ایک بیان میں جناب الطاف حسین نے کہاکہ کراچی میں عبداللہ گورنمنٹ کالج برائے خواتین کو دھمکی آمیز خط موصول ہوا ہے کہ جس میں یہ عبارت ’’کفن تیار رکھو، کل کا دن عبداللہ کالج میں ‘‘ درج ہے اور خط ملنے کے بعد کالج کی انتظامیہ شدید خوف وہراس کا شکار ہے ۔انہوں نے کہاکہ انتہاء پسند دہشت گرد تعلیمی اداروں میں خوف ودہشت کا ماحول پیدا کرکے نہ صرف تعلیمی سرگرمیاں روکنا چاہتے ہیں بلکہ نئی نسل کو حصول علم سے روکنے کی بھی سازش کررہے ہیں ۔ جناب الطاف حسین نے حکومت وانتظامیہ، ملک بھرکے تعلیمی اداروں کے اساتذہ، طلبا وطالبات اوران کے والدین پر زور دیا کہ وہ ہرلمحہ چوکنا رہیں، انہوں نے دعا کی کہ اللہ تعالیٰ ملک بھر کے تعلیمی اداروں کے اساتذہ اور طلباوطالبات کو اپنی حفظ وامان میں رکھے اور تعلیمی اداروں میں خوف ودہشت کا ماحول پیدا کرنے والے عناصر کی سازشوں کو ناکام بنائے ۔ جناب الطاف حسین نے حکومت سے مطالبہ کیا کہ عبداللہ گورنمنٹ گرلز کالج کو موصول ہونے والے دھمکی آمیز خط کاہنگامی بنیادوں پر نوٹس لیا جائے ،دیہی علاقوں سمیت ملک بھر کے تعلیمی اداروں میں حفاظتی انتظامات کو مزید بہتر بنایا جائے اور تمام تعلیمی اداروں کے اساتذہ کو اسلحہ کے لائسنس جاری کیے جائیں ۔
English Viewers