گزشتہ روز بلدیہ ٹاؤن میں واقع اسکول پر دستی بم سے حملے اور فائرنگ کے نتیجے میں زخمی ہونے والی بچی طاہرہ کے انتقال پر جناب الطاف حسین کا اظہار افسوس

لندن۔۔۔۔31مارچ 2013ء 

متحدہ قومی موومنٹ کے قائد جناب الطاف حسین نے گزشتہ روز جرائم پیشہ دہشت گردوں کی جانب سے بھتہ نہ دینے کی پاداش میں بلدیہ ٹاؤن میں واقع اسکول پر دستی بم سے حملے اور فائرنگ کے نتیجے میں زخمی ہونے والی بچی طاہرہ کے انتقال گہرے دکھ اور افسوس اظہار کیا ہے اور اس واقعہ کی سخت ترین الفاظ میں مذمت کی ہے ۔ ایک تعزیتی بیان میں جناب الطاف حسین نے جاں بحق ہونے والی بچی کے تمام سوگوار لواحقین سے دلی تعزیت وہمدردی کااظہار کرتے ہوئے دعا کی کہ اللہ تعالیٰ مرحومین کو جنت الفردوس میں اعلیٰ مقام عطا فرمائے اور سوگواران کو صبر جمیل عطا کرے ۔(آمین)۔ جناب ا لطاف حسین نے صدر مملکت آصف علی زرداری ،نگراں وزیراعظم میر ہزار خان کھوسو ، گورنر سندھ ڈاکٹر عشرت العباد اورنگراں وزیراعلیٰ سندھ جسٹس (ر) زاہد قربان علوی سے مطالبہ کیا کہ بلدیہ ٹاؤن میں دہشت گردوں کی جانب سے بھتہ نہ دینے کی پاداش میں اسکول پر دستی بم سے حملے اور فائرنگ کا سختی سے نوٹس لیاجائے ور اس بد ترین کارروائی میں ملوث دہشت گردوں کو فی الفور گرفتار کرکے قرار واقعی سزا دی جائے ۔