پولیس حراست میں ماورائے عدالت قتل کے واقعات پر عوام مارشل لاء کامطالبہ نہ کریں تو کیاکریں، محمد انور

لندن۔۔۔20، جنوری2015ء

متحدہ قومی موومنٹ کے سینئر رکن محمد انور نے اپنے ایک بیان میں پیپلزپارٹی کے رہنماء سینیٹر رحمان ملک کی جانب سے مارشل لاء کے نفاذ کی مخالفت کے بیان پر تبصرہ کرتے ہوئے کہاہے کہ رحمان ملک کو دوسروں پر تنقید کرنے کے بجائے پہلے اپنے گریبان میں جھانکناچاہیے۔ایک بیان میں محمد انور نے کہاکہ میں رحمان ملک سے سوال کرتا ہوں کہ پیپلزپارٹی کی حکومت کی جانب سے کراچی کے تمام تھانوں میں بدنام زمانہ ڈاکوؤں کی تعیناتی کرکے ایم کیوایم کے آٹھ آٹھ ، دس دس کارکنوں کو پولیس کی حراست میں وحشیانہ تشدد کا نشانہ بناکرماورائے عدالت قتل کیاجاتا رہے، ٹارگٹ کلنگ کے واقعات میں دن بدن تیزی آرہی ہے اور حکومت سندھ مکمل طور پر عوام کو تحفظ فراہم کرنے میں ناکام ہے تو پھر کراچی کے عوام مارشل لاء کے نفاذ کا مطالبہ نہ کریں تو کیاکریں۔انہوں نے کہاکہ دوسروں پر تنقید کرنے کے بجائے پہلے اپنے گریبان میں جھانکناچاہیے۔ محمد انورنے کہاکہ ناموس رسالتؐ کے خلاف ایکشن نہ لینے کا شکوہ انہوں نے کس سے کیا ہے؟ کیونکہ ناموس رسالتؐ کے نام پر پیپلزپارٹی کے دورحکومت میں پیپلزپارٹی کے گورنر پنجاب سلمان تاثیر کو قتل کیا گیاتو رحمان ملک جو اس وقت وفاقی وزیرداخلہ تھے، انہوں نے اس پرکیا ایکشن لیا؟ رحمان ملک کو زرہ برابر بھی حضورؐ سے محبت وعقیدت ہوتی تو وہ بحیثیت وفاقی وزیرداخلہ گورنر پنجاب سلمان تاثیر کے خلاف بھرپورکارروائی کرتے یا پھر اپنے عہدے استعفیٰ دے چکے ہوتے۔ آخر میں محمد انور نے کہاکہ رحمان ملک کے بیان سے عوام میں عمومی تاثر پایا جاتا ہے کہ رحمان ملک نے داعش کے سربراہ ابوبکر البغدادی کے ہاتھوں بیت کرلی ہے۔
English