ایم کیوایم پورے پنجاب سے الیکشن میں حصہ لے گی اور غریب و متوسط طبقہ کے پڑھے لکھے اور باصلاحیت افراد کو پارٹی ٹکٹ دیے جائیں گے۔ میاں عتیق شیخ

اسلام آباد۔۔۔ 21 مارچ 2013ء

متحدہ قومی موومنٹ کی سینٹرل ایگزیکٹوکمیٹی کے رکن اورایم کیوایم اسلام آباد اپرپنجاب کے صدرمیاں عتیق شیخ نے کہاہے کہ ایم کیوایم اپنی ماضی کی روایت برقرارکھتے ہوئے حالیہ انتخابات میں بھی نئی قیادت قوم کے سامنے پیش کرے گی۔اپر پنجاب کے مختلف علاقوں کے دورے کے موقع پر کارکنوں سے گفتگوکرتے ہوئے میاں عتیق شیخ نے کہا کہ ایم کیوایم واحد جماعت ہے جس نے 1987ء کے انتخابات میں ہی غریب ومتوسط طبقہ کے نوجوانوں کو بلدیات کے ایوانوں میں بھیج کر اور1988ء کے عام انتخابات میں بڑے بڑے سیاسی بت گراکر سندھ کے شہری علاقوں سے موروثی سیاست کاخاتمہ کردیا اوروہ پورے ملک سے موروثی سیاست کاخاتمہ کرناچاہتی ہے ۔میاں عتیق نے کہاکہ ایم کیوایم پورے پنجاب سے الیکشن میں حصہ لے گی اورغریب ومتوسط طبقہ کے پڑھے لکھے اورباصلاحیت افرادکوپارٹی ٹکٹ دیے جائیں گے۔ انہوں نے کہاکہ قائدتحریک الطاف حسین کاپیغام آج صرف سندھ ہی نہیں بلکہ پنجاب سمیت پورے ملک کے محروم عوام کے دلوں کی دھڑکن بن چکاہے اورانشاء اللہ آنے والے وقت میں ایم کیوایم ملک کی سب سے بڑی جماعت بن کر ابھرے گی۔