نوشہرہ میں مہاجرین کے جلوزئی کیمپ میں بم دھماکے پر الطاف حسین کااظہار مذمت ۔

لندن۔۔۔21، مارچ2013ء 

متحدہ قومی موومنٹ کے قائد جناب الطاف حسین نے نوشہرہ میں مہاجرین کے جلوزئی کیمپ بم دھماکے کی سخت ترین الفاظ میں مذمت کی ہے اور بم دھماکے میں متعدد افراد کے شہید اور زخمی ہونے پر گہرے دکھ اور افسوس کااظہار کیا ہے ۔ اپنے ایک مذہبی بیان میں انہوں نے کہاکہ درندہ صفت دہشت گردوں نے جلوزئی مہاجر کیمپ میں اس دوران بم دھماکہ کیا جب مہاجرین میں راشن تقسیم کیاجارہا تھا جس سے ثابت ہوتا ہے کہ بم دھماکے اور دہشت گردی میں ملوث سفاک دہشت گرد نہ صرف انسانیت بلکہ ملک و قوم کے کھلے دشمن ہیں ۔ انہوں نے کہاکہ بم دھماکو کے ذریعے معصوم انسانوں کو خاک و خون میں نہلانے والے دہشت گرد بربریت اور درندگی پر یقین رکھتے ہیں اور ان کا کوئی دین و ایمان نہیں رہے ۔ انہوں نے بم دھماکے میں شہید ہونے والے افراد کے تمام سوگوار لواحقین سے دلی تعزیت وہمدردی کااظہارکرتے ہوئے شہداء کے بلند درجات اور زخمیوں کی جلدو مکمل صحت یابی کیلئے دعا بھی کی ۔ جناب الطاف حسین نے صدر مملکت آصف علی زرداری اور وزیراعظم راجہ پرویز اشرف سے مطالبہ کیا کہ نوشہرہ میں مہاجرین کے جلوزئی کیمپ میں بم دھماکے کی بزدلانہ کارروائی کا سنجیدگی سے نوٹس لیاجائے اور اس میں ملوث سفاک دہشت گردوں کو فی الفور گرفتار کرکے عبرتناک انجام سے دوچار کیاجائے ۔