اپنا استعفیٰ فوری طور پر واپس لے لیں، گورنر سندھ ڈاکٹر عشرت العباد کو قائد تحریک الطاف حسین کا مشورہ

لندن ۔۔27فروری 2013ء 

ایم کیوایم کے قائد جناب الطاف نے گورنر سندھ ڈاکٹر عشر ت العبادکو مشورہ دیا ہے کہ وہ ملک خصوصاًسندھ میں امن واستحکام اورمختلف طبقوں کے مابین ہم آہنگی کی خاطرگورنر سندھ کے عہدے سے اپنا استعفیٰ فوری طور پر واپس لیکردوبارہ اپنی ذمہ داریاں سنبھال لیں اور اسی دیانت داری سے عوام کی خدمت کرتے رہیں جس طرح وہ ماضی میں انجام دیتے آئے ہیں ۔جناب الطاف حسین نے یہ بات ڈاکٹر عشرت العباد سے بد ھ کی شب فون پر گفتگو کرتے ہوئے کہی۔واضح رہے کہ گذشتہ دنوں ایم کیوایم اور پیپلز پارٹی کے مابین سیاسی اختلا فات کے تناظر میں ایم کیوایم نے حزب اختلاف میں بیٹھنے کا فیصلہ کیا تھا اور اس کے وزراء نے اپنی وزارتوں سے استعفے ٰ بھی دے دیئے تھے ۔ ایم کیوایم کے اس فیصلے کے بعد گو رنر سندھ ڈاکٹر عشرت العباد نے بھی گور نر شپ سے اپنا استعفیٰ صدر مملکت کو ارسا ل کر دیا تھا اور اپنی علالت کے پیش نظر دبئی روانہ ہو گئے تھے ۔جناب الطاف حسین نے ڈاکٹر عشر ت العباد سے فون پرگفتگوکرتے ہوئے کہا کہ آپ نے گورنر سندھ کے عہدے سے اپنا استعفیٰ رضا کارانہ طو ر پر دیا تھا تاہم تاجر وں،صنعتکاروں،تمام مکاتب فکرکے علمائے کرام اور مختلف شعبہ زندگی کے اکابرین کی جانب سے مسلسل یہ مطالبہ کیا جارہا ہے کہ میں گورنرسندھ سے استعفیٰ واپس لینے کیلئے کہوں۔ علاوہ ازیں وفاقی وزیر داخلہ رحمن ملک نے بھی صدر مملکت جناب آصف علی زرداری اوردیگرحکومتی شخصیات کے یہ پیغامات مجھ تک پہنچائے کہ ایم کیوایم اپنے سیاسی فیصلے کرنے میں آزاد ہے تاہم سندھ اور پاکستان کے مفاد میں بہتر ہوگا کہ گورنر سندھ ڈاکٹر عشر ت العباد اپنی ذمہ داریاں بدستور انجام دیتے ر ہیں ۔جناب الطاف حسین نے ڈاکٹرعشرت العبادسے کہاکہ حکومتی اراکین،تاجر وں،صنعت کاروں، علمائے کرام،اساتذہ اوردیگرشعبہء زندگی کے اکابرین کی درخواست کے پیش نظر میں آپ کو مشورہ دیتا ہوں کہ آپ اپنے استعفے ٰ کے فیصلے پر نظر ثانی کریں اورملک خصوصاًسندھ میں امن واستحکام کیلئے اپنی ذمہ داریاں دوبارہ سنبھال لیں۔