ایم کیوایم کی رابطہ کمیٹی کے رکن عارف خان ایڈووکیٹ نے جناب الطاف حسین کے خلاف دھمکی آمیز ویڈیو بیان پر لال مسجد کے خطیب مولانا عبد العزیز کے خلاف عزیز آباد تھانہ میں ایف آئی آر درج کرادی

کراچی ۔۔۔21، دسمبر2014ء 

متحدہ قومی موومنٹ کی رابطہ کمیٹی کے رکن عارف خان ایڈووکیٹ نے بانی و قائد تحریک جناب الطاف حسین کے خلاف دھمکی آمیز بیان پر لال مسجد کے خطیب مولانا عبد العزیز کے خلاف عزیز آباد تھانہ میں ایف آئی آر درج کرادی ہے ، ایف آئی آر نمبر 304/2014ہے ۔ اس موقع پر ایم کیوایم کی رابطہ کمیٹی کے انچارج قمر منصور ،رابطہ کمیٹی کے ارکان ڈاکٹر نصرت ، اسلم آفریدی ، حق پرست سینیٹرز ، حق پرست ارکان قومی وصوبائی اسمبلی بھی ان کے ہمراہ تھے ۔ عارف خان ایڈووکیٹ نے مولانا عبد العزیز کے خلاف ایف آئی آر درج کرانے کیلئے جو درخواست تھانہ میں دی اس پر رابطہ کمیٹی کے اراکین ، حق پرست سینیٹرز ، ارکان قومی وصوبائی اسمبلی کے دستخط موجود ہیں ۔ عارف خان ایڈووکیٹ نے درخواست میں موقف اختیار کیا کہ مولانا عبد العزیز کے کھلے دھمکی آمیز بیان کے بعد جناب الطاف حسین کی زندگی کو بہت سے خطرات لاحق ہوگئے ہیں جبکہ دھمکی آمیز بیان سے جناب الطاف حسین کے کروڑوں چاہنے والوں کی دل آزاری ہوئی ہے ۔مولانا عبد العزیز نے جناب الطاف حسین کو فرقہ واریت کی بنیاد پر سوشل میڈیاپر کھلی دھمکی دی ہے جس کی دھمکی آمیز ویڈیو سوشل میڈیا پر موجود ہے ۔انہوں نے مطالبہ کیا کہ دھمکی آمیز ویڈ یو میں مولانا عبدا لعزیز نے فرقہ واریت پھیلانے کیلئے گھٹیا قسم کے جملے استعمال کئے ہیں جس پر مولانا عبد العزیز کے خلاف سخت کارروائی کی جائے ۔انہوں نے درخواست میں مزید مؤقف اختیار کیا کہ قائد تحریک جناب الطاف حسین پاکستان کی تیسری بڑی جماعت کے قائد ہیں اور مولانا عبد العزیز نے کھلے دھمکی آمیز ویڈیو بیان کے ذریعے جناب الطا ف حسین اور ساکھ اور شخصیت کو نقصان پہنچانے کا گھناؤنا عمل کیا ہے جس پر جناب الطاف حسین کے کروڑوں چاہنے والے کارکنان و عوام میں شدید اشتعال اور غم وغصہ کی لہر پائی جارہی ہے ۔