آرمی پبلک اسکول پشاور کے شہداء کی یاد میں ایم کیو ایم کی جانب سے نمائش چورنگی پر لاکھوں شمعیں روشن

کراچی ۔۔۔19دسمبر 2014ء

متحدہ قومی موومنٹ کے زیر اہتمام سانحہ پشاور کے شہداء کو خراج عقیدت پیش کرنے کیلئے نمائش چورنگی پر شمعیں روشن کی گئیں۔ شمعیں روشن کرنے کی تقریب میں رابطہ کمیٹی پاکستان کے انچارج قمر منصور، اراکین رابطہ کمیٹی ، حق پرست ارکین اسمبلی ،البعلموں ، اساتذہ کرام ، دانشوروں ، فنکاروں ، اداکاروں ، صحافیوں ، خصوصی افراد سمیت لاکھوں خواتین ، بچوں ، نوجوانوں اور بزرگوں نے شرکت کی او ر سانحہ پشاور کے شہداء کو زبردست خراج عقیدت اور سلام تحسین پیش کیا۔ اس موقع پر پشاور کی المناک سانحہ کو یاد کرکے شرکاء کی آنکھیں بھر آئیں آرمی پبلک اسکول پشاور کے معصوم طلبہ کیلئے دعا ئیں بھی کیں۔ شرکاء نے ہاتھو ں میں سانحہ پشاور کے خلا ف پلے کارڈز اور بینرز تھامے ہوئے تھے جن پر طالبان دہشتگردوں کے خلاف سخت کار روائی کے مطالبات بھی درج تھے۔