ایم کیو ایم رابطہ کمیٹی کی ڈاؤ یونیورسٹی کے پوائنٹ بس میں لوٹ مار اور طالبات سے بد تمیزی کی سخت الفاظ میں مذمت

کراچی ۔۔۔9دسمبر2014ء

متحد ہ قومی موومنٹ کی رابطہ کمیٹی نے سخی حسن چورنگی کے قریب ڈاؤ یونیورسٹی کی پوائنٹ بس میں مسلح ملزمان کی لوٹ مار اور طالبات سے بدتمیزی کے واقعہ کی سخت الفاظ میں مذمت کی ہے ۔ ایک مذمتی بیان میں رابطہ کمیٹی نے کہا کہ شہر میں لوٹ مار کی وارداتوں میں سنگین حد تک اضا فہ ہوا ہے اور روزانہ کی بنیاد پر عام شہریوں سے لاکھوں روپے مالیت کے نقدی ، موبائل و یگر قیمتی آلات چھینے جانا عام بات بن چکی ہے جبکہ صوبائی حکومت شہر میں لوٹ مار روکنے میں ناکام نظر آتی ہے ۔ انہوں نے کہا کہ طلبہ کسی بھی معاشرے کے معمار اور اس ملک کی ترقی کے ضامن ہوتے ہیں لیکن طالبعلموں کے ساتھ دن دھاڑے لوٹ ماراور بدتمیزی سے صوبائی حکومت کے امن و امان کے قیام کے جھوٹے دعووں کی قلعی کھل گئی ہے ۔ رابطہ کمیٹی نے وزیر اعلیٰ سید قائم علی شاہ ، سندھ کابینہ اور قانون نافذ کرنے والے اداروں کے ذمہ داران سے پر زور مطالبہ کیا ہے کہ وہ ڈاؤ یونیورسٹی کے پوائنٹ میں لوٹ مار اور طالبات سے بد تمیزی میں ملوث مجرمان کو فوری گرفتار کرکے انہیں قانون کے مطابق سخت سزا دیں اور شہر میں طلبہ بالخصوص طالبات کو تحفظ فراہم کرنے کیلئے ہنگامی بنیادوں پر اقدامات کریں
English Viewers