قائد تحریک الطاف حسین محب وطن پاکستانی ہیں، عادل خان، رکن رابطہ کمیٹی ایم کیوایم

لندن۔۔۔2، دسمبر2014ء

متحدہ قومی موومنٹ کی رابطہ کمیٹی کے رکن محمد عادل خان نے پیپلزپارٹی کے سینیٹر سعید غنی کے بیان پر تبصرہ کرتے ہوئے کہاہے کہ قائد تحریک جناب الطاف حسین محب وطن پاکستانی ہیں اور اپنی پاکستانی شناخت کیلئے انہیں کسی سڑک چھاپ لیڈر کے سرٹیفیکٹ کی ضرورت نہیں ہے ۔ ایک بیان میں عادل خان نے کہاکہ سینیٹر سعید غنی کے غیرذمہ دارانہ بیان سے دنیا بھر میں دہری شہریت رکھنے والے پاکستانیوں کی دل آزاری ہوئی ہے جس پر انہیں عوام سے معافی مانگنی چاہیے۔ انہوں نے کہاکہ ملک بھر کے عوام اس حقیقت سے واقف ہیں کہ قائدتحریک جناب الطاف حسین بغیرتحقیق اور تصدیق کے کوئی بات نہیں کرتے ، انہوں نے 2 ماہ تک تحقیق کرنے کے بعد ہی پیپلزپارٹی کی قیادت اور ارباب اقتدارکو 15 دن کا وقت دیا ہے کہ وہ وضاحت کریں کہ بلاول بھٹو زرداری نے کیوں اور کس لئے جناب الطاف حسین کو موردالزام ٹھہرایا ہے۔ عادل خان نے کہاکہ جناب الطاف حسین کے مدلل اور حق پرستانہ مؤقف پر پیپلزپارٹی کے رہنماؤں کا واویلا ’’چور کی داڑھی میں تنکے ‘‘ کے مترادف ہے اور سینیٹر سعید غنی بھی دلائل کا جواب دلائل سے دینے کے بجائے اناپ شناپ بک رہے ہیں ۔ عادل خان نے پیپلزپارٹی کی قیادت کو مشورہ دیا کہ وہ کھوکھلے بیانات اور الزامات کے بجائے پاکستان کی بڑی سیاسی جماعت کے قائد کے خلاف ہرزہ سرائی کی وضاحت کریں اوربے بنیاد الزامات پر قوم سے معافی مانگیں۔
English Viewers Click Here