ایم کیوایم کے قائدالطا ف حسین اورپاکستان علماء کونسل کے سربراہ حافظ طاہراشرفی کے مابین فون پر گفتگو

لندن۔۔۔23 نومبر2014ء

متحدہ قومی موومنٹ کے قائدجناب الطا ف حسین اورپاکستان علماء کونسل کے سربراہ حافظ طاہراشرفی نے جماعت اسلامی کے سابق امیرمنورحسن کی جانب سے قتال فی سبیل اللہ کے کلچرکوعام کرنے کی بات کی شدیدمذمت کی ہے اورجیدعلمائے کرام سے اپیل کی ہے کہ وہ قرآن وسنت اورشریعت کی رو سے اس بیان پر روشنی ڈالیں اورقوم کی رہنمائی فرمائیں ۔ دونوں رہنماؤں نے آج فون پر ملک کی موجودہ صورتحال پر گفتگو کی ۔ دونوں رہنماؤں کاکہناتھاکہ ملک کواس وقت امن ، رواداری اوربرداشت کی ضرورت ہے لیکن منورحسن ملک کے عوام کو قتال کادرس دے رہے ہیں جونہایت افسوسناک اورقابل مذمت ہے۔ جناب الطا ف حسین اورحافظ طاہراشرفی نے اس بات پر اتفاق کیاکہ جیدعلمائے کرام بھی منورحسن کے بیان کانوٹس لیں اور قرآن وسنت اورشریعت کی روشنی میں اس معاملے پر قوم کی رہنمائی کریں۔ حافظ طاہر اشرفی نے گفتگوکرتے ہوئے کہاکہ منورحسن عوام کے سامنے اپنے بیان کی وضاحت کریں کہ وہ کس کے خلاف قتال کریں گے۔ حافظ طاہراشرفی نے جناب الطاف حسین سے اورنگی ٹاؤن میں ایم کیوایم کے ممبرسازی کیمپ پر دہشت گردوں کی جانب سے دستی بم کے حملے اورآج دہشت گردوں کی فائرنگ سے ایک اورکارکن کی شہادت پر دلی تعزیت کی اورشہداء کے لئے دعائے مغفرت کی۔ انہوں نے زخمی کارکنوں کی صحتیابی کیلئے دعاکی۔