ایم کیوا یم رابطہ کمیٹی کے ارکان احمد سلیم صدیقی اور عبد الحسیب کی حافظ جمیل راٹھور اورمعروف شیعہ عالم عون محمد نقوی سے ملاقات

کراچی ۔۔۔۔ یکم نومبر 2014ء

متحد ہ قومی موومنٹ کے قائد الطا ف حسین کی خصوصی ہدایت پر اراکین رابطہ کمیٹی احمد سلیم صدیقی اور عبد الحسیب نے ڈاکٹر حافظ جمیل راٹھور اور معروف شیعہ عالم عون محمد نقوی سے انکی رہائشگاہوں پر علیحدہ علیحدہ ملاقات کرکے جناب الطاف حسین کامحرم الحرام کے دوران مذہبی رواداری ، انتہاء پسندی کے خاتمے اور برداشت کا پیغام پہنچایا۔اس موقع پر حق پرست ارکان اسمبلی سفیان یوسف ، جمال احمد ،ریحان ظفر ، انور رضا،ایم کیو ایم علماء کمیٹی کے انچارج و ذمہ داران و دیگر انکے ہمراہ تھے ۔علماء کرام سے گفتگو کرتے ہوئے اراکین رابطہ کمیٹی نے کہا کہ دنیا کے مختلف مسلم ممالک میں انتہاء پسند گروپس شیعہ سنی فسادات کو ہوا دے رہے ہیں اور ملک میں شیعہ اور سنی فرقوں میں تصادم اور اختلا ف کی خواہش رکھنے والی قوتیں ایک مرتبہ پھر محرم الحرام کے دوران انتشار پھیلانے کی سازشیں کر رہی ہیں۔ رابطہ کمیٹی نے کہا کہ جناب الطاف حسین نے پاکستا ن میں امن و رواداری کیلئے میں ملک بھر کے علماء کرام سے اپیل کی ہے کہ وہ آپس میں اتحاد اور اتفاق قائم کرکے سازشی عناصر کو ناکام بنادیں۔ اراکین رابطہ کمیٹی نے کہا کہ اگر آج ہم نے ملک میں ان خطرناک گروپس کی موجودگی کا نوٹس نہ لیا اور اپنی صفوں میں اتحاد قائم نہ کیا تو اس کے نتائج انتہائی سنگین ہوں گے ۔ ملاقاتوں کے موقع پر علماء کرام نے مذہبی رواداری کے قیام کیلئے جناب الطاف حسین کی کاوشوں کو سراہتے ہوئے کہا کہ ایم کیوا یم کے قائد الطاف حسین ملک کے واحد سیاسی رہنما ہیں جو نا صرف سیاسی مسائل بلکہ مذہبی مسائل کے حل کیلئے بھی کوشاں ہیں اور ان کے کارکنان دن رات ملک میں امن و محبت کی فضا ء کے قیام کی جدو جہد کر رہے ہیں ،علما ء کرام نے ارکان رابطہ کمیٹی کو اپنے بھر پور تعاون کی یقین دہانی کرواتے ہوئے دعا کی کہ اللہ تعالیٰ پاکستان میں بسنے والے تمام مکاتب فکر اور مذاہب کے عوام میں محبت و اتفاق قائم کرے ،محرم الحرام کا یہ مہینہ ساتھ خیرت کے اختتام پزیر ہو اور اللہ تعالیٰ ملک سے مذہبی منافرت اور انتہاء پسندی کے خاتمے کی جدو جہد کرنے والے تمام افراد کی نیکی کوقبول فرمائے۔