حق پرست رکن صوبائی اسمبلی یوسف شاہوانی کا ممکنہ سمندری طوفان کے پیش نظر ساحلی علاقوں میں قائم گوٹھوں کا دورہ

متحد ہ قومی موومنٹ کے قائد الطاف حسین کی خصوصی ہدایت پر ایم کیو ایم رابطہ کمیٹی کے رکن اور حق پرست رکن صوبائی اسمبلی یوسف شاہوانی نے ممکنہ سمندری طوفان ’’ نیلوفر‘‘ کے پیش نظر وفد کے ہمراہ اپنے حلقہ انتخاب ہاکس بے میں واقع عبد الرحمن گوٹھ اور مبارک ولیج کا دورہ کیا اور علاقہ مکینوں سے ملاقات کی۔ اس موقع پر ایم کیوایم کی کراچی مضافاتی آرگنائزنگ کمیٹی کے انچارج فرخ اعظم، جوائنٹ انچارج اسلم بلوچ ، اراکین کمیٹی ،THOہیلتھ کیماڑی ٹاؤن اشرف سعید الزماں صدیقی، اسٹنٹ کمشنر عبد العلیم جاگیرانی اور ADOایلمنٹری ایجوکیشن کیماڑی عبد الطیف برفت بھی انکے ہمراہ تھے ۔ دورے کے موقع پر حق پرست رکن صوبائی اسمبلی نے مذکورہ افسران کو ممکنہ سمندری طوفان ’’نیلوفر‘‘ کے پیش نظر حفظاتی اقدامات کرنے کی ہدایت کی اور کسی بھی ممکنہ ہنگامی صورتحال میں علاقہ مکینوں کو مکمل سہولیات فراہم کرنے کی تلقین کی ۔ یوسف شاہوانی نے علاقہ معززین سے تبادلہ خیال کرتے ہوئے کہا کہ جناب الطاف حسین کے کارکنان اور رضاکاران ہر مشکل گھڑی ، ناگہانی آفت کی صور ت میں عوامی خدمت کے لئے ہر گھڑی تیار رہتے ہیں اور ممکنہ سمندری طوفان ’’ نیلوفر ‘‘ کے پیش نظر جناب الطاف حسین نے ہمیں ساحلی پٹیوں پر مقیم ہم وطنوں کی دادرسی کی ہدایت کی ہے ۔ انہوں نے کہاکہ ایم کیو ایم ملک سے جاگیر داری ، سرمایہ داری نظام کے خاتمے اور غریبوں کو با اختیار بنانے کیلئے 30برسوں سے جدوجہد کر رہی ہے ۔ اس موقع پر علاقہ کے عوام نے یوسف شاہوانی کی آمد پر جناب الطاف حسین کاشکریہ اداکیااورجناب الطاف حسین کی صحت تندرستی اور عمر درازی کیلئے دعا کی ۔ دریں اثناء حق پرست رکن صوبائی اسمبلی نے ہاکس بے روڈ سپنسری میں قائم ریلیف کیمپ کا دورہ کیا اور وہاں عوام کو فراہم کی جانے والی سہولیات کا جائزہ لیکر عملے کو بہتر کام کی ہدایت کی ۔