ایم کیوایم کے قائد الطاف حسین نے مولانا فضل الرحمن کوفون کرکے ان کی خیریت دریافت کی

لندن۔۔۔ 24 اکتوبر2014ء

متحدہ قومی موومنٹ کے قائدجناب الطاف حسین نے جمعیت علمائے اسلام (ف) کے سربراہ مولانا فضل الرحمن کوفون کرکے ان کی خیریت دریافت کی ۔ جناب الطاف حسین نے مولانا فضل الرحمن سے گفتگوکرتے ہوئے کہاکہ ملک کے لوگ ایک گھرکے افرادکی مانندہوتے ہیں اورگھر کے کسی فردکوکوئی تکلیف پہنچتی ہے تو اس کااحساس گھرکے ہرفردکوکرناچاہیے ، یہ اسلام کی تعلیمات بھی ہیں اور معاشرتی اقداراورتہذیبی تقاضوں کاحصہ بھی ہے کہ ہم ایک دوسرے کے دکھ میں شریک ہوں۔ ہمیں آپ پر ہونے والے خودکش حملے کے واقعہ پر شدیددکھ پہنچاہے اورہم اس واقعہ پر آپ اورآپ کے تمام عقیدت مندوں اور کارکنوں سے ہمدردی اوریکجہتی کااظہارکرتے ہیں۔انہوں نے کہاکہ ہم اللہ تعالیٰ کے شکرگزارہیں کہ اس نے ایک علمی خزانے اوراصولوں کیلئے جدوجہد کرنے والی ایک نڈرشخصیت کو دشمنوں کے شرسے محفوظ رکھا۔جناب الطاف حسین نے خودکش حملے کی شدیدمذمت اورتشویش کااظہارکرتے ہوئے کہاکہ ملک کی جڑوں میں دیمک لگ گئی ہے اورکچھ سمجھ نہیں آتاکہ ملک کوکس طرف لے جایاجارہاہے۔انہوں نے دھماکے میں جے یوآئی کے کارکنوں اورہمدردوں کی شہادت پر مولانا فضل الرحمن سے تعزیت کی اورزخمیوں کی صحتیابی کیلئے دعاکی۔ مولانا فضل الرحمن نے دکھ کی اس گھڑی میں تعزیت وہمدردی اوریکجہتی کااظہار کرنے پر جناب الطاف حسین اورایم کیوایم کے رہنماؤں کاشکریہ اداکیااورکہاکہ مارنے والے سے بچانے والابڑاہے۔انہوں نے جناب الطاف حسین کیلئے بھی دعاکی اوران کے لئے نیک جذبات کااظہارکیا۔