ہنگومیں دوغ سرائے آئی ڈی پیزکے کیمپ میں بم دھماکے پرایم کیوایم کے قائدالطا ف حسین کااظہارمذمت

لندن ۔۔28ستمبر 2014ء 

متحدہ قومی موومنٹ کے قائد جناب الطاف حسین نے ہنگومیں دوغ سرائے آئی ڈی پیزکے کیمپ میں موٹرسائیکل میں نصب ریموٹ کنٹرول بم دھماکے کی سخت ترین الفاظ میں مذمت کی ہے اور اسے بدترین دہشت گردی قراردیتے ہوئے دھماکے کے نتیجے میں معصوم بچوں سمیت پانچ افرادکے جاں بحق ہونے پراپنی تشویش کااظہارکیا ہے ۔ایک بیان میں جناب الطا ف حسین نے کہاکہ ملک دشمن دہشت گرد،آپریشن ضرب عضب سے شدیدخوف زدہ ہیں اور یہی وجہ ہے کہ وہ معصوم شہریوں،مسلح افواج کے جوانوں اورسیکورٹی اہلکاروں سمیت بزرگان دین کے مزارات اورعبادتگاہوں کو تسلسل کے ساتھ دہشت گردی کانشانہ بنارہے ہیں۔انہوں نے کہا کہ دوسرائے میںآئی ڈی پیزکے کیمپ میں بم دھماکہ اس سلسلے کی کڑی ہے جس کی جتنی بھی مذمت کی جائے کم ہے ۔انہوں نے کہاکہ جوعناصراس قسم کے بزدلانہ ہتھکنڈے استعمال کرکے معصوم لوگوں کودہشت گردی کانشانہ بنارہے ہیں اورملک وقوم کو نقصان پہنچا رہے ہیں وہ اللہ کے عذاب سے نہیں بچ سکیں گے اوراس دنیامیں اپنے منطقی انجام کوپہنچیں گے۔جناب الطاف حسین نے بم دھماکے میں جاں بحق ہونیوالے افرادکے لواحقین سے دلی تعزیت و ہمدردی کااظہارکرتے ہوئے انہیں صبرکی تلقین کی اوردعاکی کہ اللہ تعالیٰ جاں بحق افراد کواپنی جواررحمت میں جگہ عطافرمائے اورزخمیوں کوصحت وتندرستی عطا کرے ۔جناب الطاف حسین نے وزیراعظم میاں محمدنوازشریف،وفاقی وزیرداخلہ چوہدری نثارعلی خان اور خیبرپختونخواہ کی حکومت سے مطالبہ کیاکہ ہنگوآئی ڈی پیزکے کیمپ میں بم دھماکے کاسختی سے نوٹس لیاجائے اورتحقیقات کرکے دھماکے میں ملوث دہشت گردوں اوران کے سرپرستوں کوقرارواقعی سزادی جائے ۔