ايم ڪيو ايم رابطا ڪميٽي جي سابق ڊپٽي ڪنوينر ۽ سابق صوبائي وزير شعيب احمد بخاري ايڊووڪيٽ کي سوين آلين اکين سان گڏ ياسين آباد جي قبرستان ۾ مٽي ماءُ حوالي ڪيو ويو
جنازي نماز ۽ تدفين ۾ رابطا ڪميٽي جي سينيئر ڊپٽي ڪنوينر عامر خان، ڊپٽي ڪنوينر شاهد پاشا،فيصل ايڌي، صوبائي وزير قيوم سومري، حافظ احمد علي، علي حسن، مطلوب اعواڻ، رابطا ڪميٽي ميمبرن، حق پرست سينيٽرن ۽ اسيمبلي ميمبرن کان علاوه ڪارڪنن وڏي تعداد ۾ شرڪت ڪئي
ڪراچي: 20 جولائي 2016
متحده قومي موومينٽ جي رابطا ڪميٽي جي سابق ڊپٽي ڪنوينر ۽ سابق صوبائي وزير سيد شعيب احمد بخاري کي سوين آلين اکين سان گڏ ياسين آباد جي شهداء قبرستان ۾ مٽي ماءُ حوالي ڪيو ويو. ان کان اڳ مرحوم جي جنازي نماز جناح گرائونڊ عزيز آباد ۾ ادا ڪئي وئي. جنهن ۾ رابطا ڪميٽي جي سينيئر ڊپٽي ڪنوينر عامر خان، ڊپٽي ڪنوينر شاهد پاشا،عبدالستار ايڌي مرحوم جي فرزند فيصل ايڌي، صوبائي وزير قيوم سومري، مولانا سميع الحق گروپ سنڌ جي جنرل سيڪريٽري حافظ احمد علي، علي ڪرار نقوي، علامه اطهر مشهدي، مرزٰي يوسف، مطلوب اعواڻ چيئر مين آل پاڪستان سني تحريڪ ، مجلس وحدت المسلمين جي علي حسن، رابطا ڪميٽي ميمبرن،حق پرست سينيٽرن ۽ اسيمبلي ميمبرن، شعبن جي ميمبرن ۽ مرحوم جي مٽن مائٽن کان علاوه ڪارڪنن وڏي تعداد ۾ شرڪت ڪئي. مرحوم جي جنازي نماز مولانا تبشير الحق ٿانوي پڙهائي ان موقعي تي ميڊيا سان ڳالھھ ٻولھھ ڪندي رابطا ڪميٽي ميمبر عارف خان ايڊووڪيٽ چيو ته شعيب بخاري مرحوم اڄ اسان ۾ نه آهن پر اهي مرڻ گهڙي تائين قائد تحريڪ جناب الطاف حسين سان وفادار رهيا. انهن چيو ته مرحوم جيل جون تڪليفون به برداشت ڪيون پر اهي ڪڏهن به نه جهڪيا . انهن چيو ته مرحوم جي سڃاڻپ جناب الطاف حسين ۽ ايم ڪيو ايم ئي هئي. انهن چيو ته مرحوم جڏهن گرفتار ٿيا هئا ته انهن تي سخت تشدد ڪيو ويو هو جنهن جي ڪري اهي اڪثر بيمار رهندا هئا ۽ انهي بيماري جي ڪري اڄ انهن جي وفات ٿي آهي.
*****