اعتزاز احسن کي ايم ڪيو ايم جي ڳڻتي ۾ ڏٻرو ٿيڻ جي ڪائي به گهرج نه آهي. ايم ڪيو ايم رابطا ڪميٽي ميمبر قاسم علي رضا
ڪراچي: 11 مارچ 2016
متحده قومي موومينٽ جي رابطا ڪميٽي جي ميمبر قاسم علي رضا پي پي جي سينيٽر چوڌري اعتزاز احسن جي بيان تي تبصرو ڪندي چيو ته اعتزاز احسن کي ايم ڪيو ايم جي ڳڻتي ۾ ڏٻرو ٿيڻ جي ڪائي به ضرورت نه آهي. انهن چيو ته لياري گينگ وار جي مُک ڏوهاري عذير بلوچ جي گرفتاري پي پي کي ناني ۽ ڏاڏي سميت سمورن بزرگن جي ياد ڏياري ڇڏي آهي. پنهنجي هڪ بيان ۾ قاسم علي رضا چيو ته اعتزاز احسن ايم ڪيو ايم تي اجايو تبصرو ڪرڻ جي بجاءِ عوام کي ٻڌائين ته پي پي 8 سالن کان سنڌ تي حڪومت ڪري رهي آهي. پر سنڌ جا عوام اڄ به بنيادي سهولتن کان محروم آهن ڇو؟ انهن چيو ته ڊاڪٽر عاصم کان پوءِ هاڻي نثار مورائي جي گرفتاري سان پي پي جي قيادت جي ننڊ ڦٽي چڪي آهي ۽ پي پي جون بنيادون لڏڻ واريون آهن.ان جي ڪري ئي اعتزا ز احسن پنهنجي جماعت جي ناڪامين تي پردو وجهڻ جي لاءِ ايم ڪيو ايم کي تنقيد جو نشانو بڻائي رهيا آهن. قاسم علي رضا چيو ته اعتزاز احسن کي گهرجي ته اهي اجايا تبصرا ڪرڻ جي بجاءِ پنهنجي پارٽي ڏانهن توجه ڏين .
*****