حق جي جدوجهد ڪرڻ وارن کي هميشه آزمائشن ۽ امتحانن مان گذرڻو پوي ٿو. قائد تحريڪ جناب الطاف حسين
لنڊن ۽ پاڪستان جي رابطا ڪميٽي ۽ شعبن جي ميمبرن سان ٽيليفون تي ڳالھھ ٻولھھ
لنڊن: پهرين فيبروري 2016
متحده قومي موومينٽ جي قائد جناب الطاف حسين فرمايو آهي ته ايم ڪيو ايم حق جي راھ تي هلڻ واري تحريڪ آهي ۽ حق جي جدوجهد ڪرڻ وارن کي هميشه آزمائشن ۽ امتحانن مان گذرڻو پوي ٿو ۽ جيڪي ڪنهن به امتحان ۾ ثابت قدم رهن ٿا ته الله تعالٰي به انهن کي ئي ڪامياب ڪري ٿو. اها ڳالھھ انهن رابطا ڪميٽي لنڊن ۽ پاڪستان جي ميمبرن ۽ شعبن جي ميمبرن سان ڳالھھ ٻولھھ ڪندي فرمائي. جناب الطاف حسين فرمايو ته ايم ڪيو ايم غريب ۽ وچولي طبقي جي عوام جي حقن جي لاءِ جدوجهد ڪري رهي آهي. ايم ڪيو ايم جي جدوجهد پريشان ۽ ڏتڙيل ماڻهن کي مسئلن ۽ پريشانين مان ڪڍڻ ۽ انهن کي عزت واري زندگي گذارڻ جو موقعو فراهم ڪرڻ آهي. جڏهن کان ايم ڪيو ايم وجود ۾ آئي آهي ته ان هر دور ۾ هر طرح جي امتحانن ۽ آزمائشن کي منھھ ڏنو آهي ۽ اڄ به ڏيئي رهي آهي. اسان پنهنجي مقصد ۾ سچا آهيون ۽ اسان جي نيت ۽ ارادو به نيڪ آهي ، ان جي ڪري الله تعالٰي هر آزمائش جي وقت اسان کي همت، حوصلو ۽ طاقت عطا فرمائي آهي ۽ هر امتحان ۾ ڪامياب به ڪيو آهي. انهن تحريڪ جي سمورن ڪارڪنن ۽ عوام کي چيو ته اهي به پنهنجين صفن ۾ اتحاد برقرار رکن. ڪنهن به آزمائش کان هرگز به نه گهبرائين ۽ هر قسم جي حالتن ۾ پنهنجن حوصلن کي بلند رکن.ثابت قدمي سان پنهنجي جدوجهد جاري رکن ۽ ان ڳالھھ تي مڪمل يقين رکن ته حق ۽ صداقت جي جدوجهد ڪرڻ وارن کي الله تعالٰي جي مدد حاصل هوندي آهي. الله تعالٰي اسان کي هر امتحان ۾ ڪامياب ڪندو ۽ انشاء الله تعالٰي فتح حق پرستن جو مقدر بڻجندي.