باچا خان يونيورسٽي تي دهشت گردن جي حملي تي ايم ڪيو ايم جي قائد جناب الطاف حسين جي طرفان مذمت جو اظهار.
لنڊن: 20 جنوري 2016
متحده قومي موومينٽ جي قائد جناب الطاف حسين چارسده ۾ باچا خان يونيورسٽي تي دهشت گردن جي حملي کي بدترين ۽ بزدلاڻه ڪاروائي قرار ڏنو آهي ۽ دهشت گردن جي حملي جي نتيجي ۾ پروفيسر ڊاڪٽر حامد،شاگردن، گارڊ ۽ پوليس اهلڪارن جي شهادت ۽ ڪيترن ئي شاگردن ۽ ٻين استادن جي زخمي ٿيڻ تي وڏي ڏک ۽ افسوس جو اظهار ڪيو آهي.پنهنجي هڪ مذمتي بيان ۾ جناب الطاف حسين فرمايو ته ملڪ ۾ دهشت گردن جو هڪ ڀيرو ٻيهر ڪنڌ کڻن وڏي ڳڻتي جي ڳالھھ آهي ۽ دهشت گردن جي طرفان ملڪ ۾ ڪجھھ وقت کان لڳاتار بم ڌماڪن کان پوءِ هاڻي باچا خان يونيورسٽي تي حملي آپريشن ضرب عضب جي ڪاميابين کي ڦڪو ڪري ڇڏيو آهي. انهن فرمايو ته پشاور ۾ آرمي پبلڪ اسڪول جي سانحي جا ڦٽ اڃان تازه ئي هئا ته دهشت گردن باچا خان يونيورسٽي کي نشانو بڻائي ڇڏيو ۽ باچا خان يونيورسٽي تي دهشت گردن جي حملي سان مون کي ذاتي ۽ دلي طور صدمو پهتو آهي. انهن فرمايو ته دهشت گردن جي طرفان تعليمي ادارن کي نشانو بڻائڻ انهن جي حيوانيت ۽ جهالت جو کليل ثبوت آهي ۽ اهڙي وقت ۾ ضرورت ان ڳالھھ جي آهي ته آپريشن ضرب عضب جي رخ کي درست ڪيو وڃي ۽ جيٽ بليڪ دهشت گردن ۽ انهن جي مددگارن کي ڪنهن به صورت ۾ ڍر نه ڏني وڃي ۽ انهن جي خلاف سخت
ترين ڪاروائي ڪري انهن کي هن ڌرتي تان ميٽيو وڃي. انهن ان حملي ۾ شهيد ٿيندڙ پروفيسر، شاگردن، سيڪيورٽي گارڊ ۽ پوليس اهلڪارن جي سوگوار پونئرن سان دلي تعزيت ۽ همدردي جو اظهار ڪندي دعا فرمائي ته الله تعالٰي شهيدن کي جنت الفردوس ۾ اعلٰي مقام عطا فرمائي ۽ زخمين کي جلد و مڪمل صحتيابي عطا فرمائي.آمين. ان کان علاوه جناب الطاف حسين وزير اعظم ميان نواز شريف، آرمي چيف جنرل راحيل شريف ۽ وزير اعلٰي ڪي پي ڪي پرويز خٽڪ کان مطالبو ڪيو ته باچا خان يونيورسٽي تي حملي ۾ ملوث وحشي دهشت گردن، انهن جي مددگارن ۽ سرپرستن جو خاتمو ڪيو وڃي ۽ ملڪ ۽ قوم کي دهشت گردي کان نجات ڏيارڻ جي لاءِ سمورين قومن کي ساڻ ملائي ڪري اتحاد ۽ ڀائيچاري سان ڪم ڪيو وڃي.