لياقت علي خان جي شهادت جي وقت انهن جي پاڪستان ۾ ڪائي به ملڪيت نه هئي ۽ انهن جو بينڪ بيلنس به صرف 12 روپيا هو. ايم ڪيو ايم رابطا ڪميٽي.
لياقت علي خان جا والد نواب رستم علي خان هندستان جي تمام وڏي شخصيت هئا ۽ انهن کي رڪن الدين دوله شمشير جنگ جو خطاب به مليل هو.رابطا ڪميٽي.
اهڙي شخصيت تي ڪرپشن جا الزام لڳائيندي وقت قائم علي شاھ کي شرم اچڻ گهرجي ها.
ڪراچي: 12 ڊسمبر 2015
متحده قومي موومينٽ جي رابطا ڪميٽي وزير اعلٰي سنڌ سيد قائم علي شاھ جي بيان تي تبصرو ڪندي انهن جي بيان جي سخت ترين لفظن ۾ مذمت ڪئي آهي. رابطا ڪميٽي چيو ته اسان وزير اعلٰي کي ٻڌائڻ چاهيون ٿا لياقت علي خان جا والد نواب رستم علي خان هندستان جي تمام وڏي شخصيت هئا ۽ انهن کي رڪن الدين دوله شمشير جنگ جو خطاب به مليل هو ۽ اهي هندستان جا وڏا جاگيردار به هئا پر لياقت علي خان ڪڏهن به پنهنجي والد جي ان زمين کي ڪليم نه ڪيو ۽ ان جي بدلي ۾ پاڪستان ۾ ڪائي به زمين حاصل نه ڪئي. رابطا ڪميٽي چيو ته لياقت علي خان جي شهادت جي وقت انهن جي پاڪستان ۾ ڪائي به ملڪيت نه هئي ، جڏهن جو انهن جو بينڪ بيلنس به صرف 12 روپيا هو ۽ جڏهن لياقت علي خان کي غسل ڏنو ويو ته انهن جي جسم تي پاتل گنجي به ڦاٽل هئي. اهڙي ايماندار ۽ ديانتدار شخص ۽ قومي اڳواڻ تي ڪرپشن جو الزام هڻڻ سراسر احسان فراموشي آهي. رابطا ڪميٽي چيو ته لياقت علي خان 1946 جي اليڪشن ۾ هندستان جي مرڪزي ساز مجلس جا ميمبر به چونڊيا ويا هئا ۽ انهي اليڪشن ۾ قائد اعظم محمد علي جناح به ميمبر چونڊيا ويا هئا. رابطا ڪميٽي چيو ته اهڙي شخصيت تي جنهن جو ماضي ۽ حال هڪ کليل ڪتاب وانگر هجي انهن تي ڪرپشن جا الزام هڻندي وقت وزير اعلٰي قائم علي شاھ کي شرم اچڻ گهرجي ها. رابطا ڪميٽي وزير اعلٰي سنڌ کي چيو ته اهي لياقت علي خان تي بي بنياد الزام هڻڻ تي قوم کان معافي وٺن.
*****