ایم کیو ایم امریکہ کا کراچی میں کارکنان کے ماورائے عدالت قتل کے خلاف مظاہرہ

شکاگو : 20 ؍ فروری 2014ء

کراچی میں ایم کیو ایم کے کارکنان کے ماورائے عدالت قتل اور 45 سے زائد لاپتہ کارکنان کی بازیابی کے لئے ایم کیو ایم امریکہ کے زیر اہتمام شکاگو میں احتجاجی مظاہرہ کی گیا۔ مظاہرے میں ایم کیو ایم امریکہ کے سینٹرل آرگنائزر جنید فہمی، جوائنٹ آرگنائزرز محمد ارشد حسین اور ندیم صدیقی سمیت سینٹرل کمیٹی کے اراکین ، انچارجز اور مختلف شعبہ جات کے ذمہ داران ، کارکنان اور ہمدردوں کے ساتھ پاکستانی کمیونیٹی نے بھی شرکت کی۔ مظاہرین شدید سردی اور برف باری کے باوجود ایم کیو ایم اور قائد تحریک جناب الطاف حسین کے حق میں فلک شگاف نعرے لگاتے رہے۔مظاہرے سے اپنے خطاب میں سینٹرل آرگنائزر جنید فہمی نے ایم کیو ایم کے کارکنان پر وحشیانہ تشدد اور ماورائے عدالت قتل کی شدید الفاظ میں مذمت کرتے ہوئے کہا کہ پاکستان کے سب سے بڑے شہر میں ایک بار پھر قانون کے نام پر قانون کی دھجیاں اڑائی جا رہی ہیں۔قانون نافذ کرنے والے اداروں کی جانب سے ایم کیو ایم کیخلاف جانبدارانہ کاروائیوں کو دیکھ کر یہ اندازہ لگانا مشکل نہیں کہ 1992کے آپریشن کا اسکرپٹ دہرایا جارہا ہے۔ انہوں نے کہا کہ محب وطن مہاجروں کو تیسرے درجے کا شہری سمجھ کران کا قتل عام کیا جارہا ہے اور پاکستان کی تمام مذہبی اور سیاسی جماتیں اس انسانیت اور ملک دشمن عمل پر گونگی، بہری اور اندھی بنی ہوئی ہیں۔ اس موقع پر جوائنٹ آرگنائزرز محمد ارشد حسین اور ندیم صدیقی نے کہا کہ 2014 ء میں ایم کیو ایم کے معصوم کارکنان پر ظلم و تشدد، ماورائے عدالت قتل اور انسانی حقوق کی سنگین خلاف ورزیوں نے ملکی اور بین لاقوامی سطح پر پاکستان کے امیج کو بری طرح متاثر کیا ہے۔انہوں نے کہا کہ پاکستا ن بنانے والوں اورملک سے محبت کرنے والوں کے خلاف یہ متعصبانہ رویہ کسی گہری سازش کا شاخسانہ معلوم ہوتا ہے ۔مظاہرے کے شرکہ نے وزیر اعظم میاں نواز شریف، وفاقی وزیر داخلہ چودھری نثاراور چیف جسٹس آف پاکستان سے مطالبہ کیا کہ وہ اس خفیہ ہاتھ کا پتہ چلائیں کہ جو پاکستان کی شہ رگ کراچی کو مفلوج کر کے یہاں انارکی اور انتشار کی صورتحال پیدا کرنے کے در پے ہے۔انہوں نے ارباب اقتدار اور اختیار سے مطالبہ کیا کہ ایم کیو ایم کے شہداء کے لواحقین کو فوری انصاف فراہم کیا جائے اور لاپتہ کارکنان کی بازیابی کے لئے احکامات جاری کئے جائیں۔