حیدر آباد میرے چاہنے والوں کا شہر ہے، قائد ایم کیوایم الطاف حسین

لندن۔۔۔16، اکتوبر2013ء

متحدہ قومی موومنٹ کے قائد جناب الطاف حسین نے کہاہے کہ حیدرآباد ، الطاف حسین کے چاہنے والوں کا شہر ہے اور اس شہر کے عوام نے ہرکٹھن اور آزمائش کی گھڑی میں ثابت قدمی سے ایم کیوایم کا ساتھ دیا ہے۔ یہ بات انہوں نے عیدالاضحی کے پہلے روزخدمت خلق فاؤنڈیشن کے تحت حیدرآباد میں قربانی کی کھالیں جمع کرنے کے سلسلے میں قائم کیمپ میں موجود رضاکاروں سے ٹیلی فون پر خطاب کرتے ہوئے کہی۔ اس موقع پر حیدرآباد کے کارکنان اور خدمت خلق فاؤنڈیشن کے رضاکاروں کا جوش وخروش قابل دید تھا۔ جناب الطاف حسین نے کہا کہ ایم کیوایم مشکل ، کٹھن اور کڑی آزمائشوں سے گزر کر ثابت قدم رہنے والے کارکنان وہمدردوں کی جماعت ہے اور ایم کیوایم جیسے کارکنان پاکستان تو کجا دنیا کی کسی بھی جماعت میں نہیں ہیں، حیدرآباد شہر کے عوام کی اپنے الطاف بھائی سے محبت کسی سے ڈھکی چھپی نہیں ہے اور مجھے امید ہے کہ حیدرآباد اور اس سے ملحقہ علاقوں کے عوام ماضی کی طرح قربانی کی کھالیں خدمت خلق فاؤنڈیشن کوعطیہ کریں گے۔جناب الطاف حسین نے حیدرآباد سے تعلق رکھنے والے پرنٹ اور الیکٹرانک میڈیا کے مالکان، پروڈیوسرز ،رپورٹرز، فوٹوگرافرز ، کیمرہ مین اور اینکرپرسنزکو زبردست خراج تحسین پیش کیا اور انہیں عید کی دلی مبارکباد دی۔ جناب الطاف حسین نے سندھ بھر میں قیام امن کیلئے دیانتداری سے فرائض انجام دینے والے رینجرزاورپولیس کے افسران واہلکاروں کو خراج تحسین پیش کیا اورانہیں عید کی مبارکباد دی۔ جناب الطاف حسین نے حیدرآباد کے تاجروں ، صنعتکاروں ، دکانداروں اور زندگی کے دیگر شعبوں سے تعلق رکھنے والے افراد کو بھی عید کی مبارکباد پیش کرتے ہوئے کہاکہ حیدرآباد کے کاروباری طبقہ نے ہمیشہ ایم کیوایم سے بھرپورتعاون کیا ہے ، میری دعا ہے کہ اللہ تعالیٰ ان کے کاروبار میں برکت عطافرمائے ۔انہوں نے ایم کیوایم کے تمام ذمہ داران اورکارکنان کو ہدایت کی کہ وہ حیدرآباد کی ایک ایک ماں ، بہن، بزرگ، نوجوان اور بچے کو میرا سلام اور عیدالاضحی کی مبارکباد پہنچائیں۔