حق پرست ارکان سندھ اسمبلی یوسف شاہوانی اور سیف الدین خالد عباسی شہید اسپتال سے دوبارہ تادم مرگ بھوک ہڑتالی کیمپ میں واپس آگئے

کراچی ۔۔۔20، اگست2016ء 

کراچی پریس کلب کے باہر تادم مرگ بھوک ہڑتال پر بیٹھے ہوئے متحدہ قومی موومنٹ کے حق پرست ارکان سندھ اسمبلی یوسف شاہوانی اور سیف الدین خالد عباسی شہید اسپتال سے دوبارہ تادم مرگ بھوک ہڑتالی کیمپ میں واپس آگئے ۔تادم مرگ بھوک ہڑتال کے چوتھے روز صبح یوسف شاہوانی اور سیف الدین خالد بھوک ہڑتالی کیمپ میں خدمت خلق فاؤنڈیشن کی ایمبولینس کے ذریعے پہنچے تو ایم کیوایم کی رابطہ کمیٹی کے ارکان نے دونوں کی خیریت دریافت کی اور ان کے ہمت ، حوصلے اور جذبے کوسراہایا ۔ حق پرست ارکان سندھ اسمبل یوسف شاہوانی اور سیف الدین خالد کا کہنا تھا کہ بھوک ہڑتالی کیمپ پر واپس آنے کا مقصد یہی ہے کہ ہم اپنی جانیں دیدیں گے لیکن اپنے جائز مطالبات سے دستبردار نہیں ہوں گے ، یہ وفاقی اور سندھ حکومت سمیت سیاسی و جمہوری جماعتوں کے رہنماؤں کی بے حسی ہے کہ بھوک ہڑتال آج چوتھے دن میں داخل ہوگئی ہے اور بھوک ہڑتالیوں کی طبیعت مسلسل بگڑ رہی ہے ، ڈاکٹرز انہیں بھوک ہڑتال پر بیٹھنے سے مزید منع کررہے ہیں لیکن جس مقصد کیلئے تادم مرگ بھوک ہڑتال کی گئی ہے اسے حل کرنے کیلئے کھلی بدنیتی کا مظاہرہ کیا جارہا ہے ۔ 

واضح رہے کہ یوسف شاہوانی اور سیف الدین خالد کی طبیعت بھوک ہڑتال کے تیسرے دن شام میں بگڑ گئی تھی اور انہیں فوری طور پر ڈاکٹروں کی ہدایت پر عباسی شہید اسپتال منتقل کیا گیا تھا جہاں زیر علاج رہنے کے بعد وہ چوتھے دن دوبارہ بھوک ہڑتالی کیمپ میں واپس پہنچ گئے ہیں ۔