جنرل کیانی نے حساس معاملات پردانش مندانہ مؤقف پیش کرکے پوری قوم کے سرفخر سے بلند کردیئے ہیں
پوری قوم انہیں اور ان سمیت مسلح افواج کے ایک ایک افسر اور سپاہی کو سلام پیش کرتی ہے
قائد تحریک الطاف حسین کی جانب سے مسلح افواج کے سربراہ کے بیان کاخیرمقدم
لندن۔۔۔30، اپریل2013ء
متحدہ قومی موومنٹ کے قائد جناب الطاف حسین نے یوم شہداء پر فوج کے اجتماع سے چیف آف آرمی اسٹاف جنرل اشفاق پرویز کیانی کے خطاب کا زبردست خیرمقدم کرتے ہوئے کہاہے کہ جنرل اشفاق کیانی نے انتہائی حساس معاملات پر جس جرات مندی کے ساتھ اپنے مؤقف کا اظہار کیا ہے اس پر انہیں جتنا خراج تحسین پیش کیا جائے وہ کم ہے ۔ جناب الطاف حسین نے کہاکہ جنرل اشفاق پرویز کیانی نے عملاً ثابت کردیا ہے ہ وہ ایک ایسے بہادر اور نڈرسپاہی ہیں جو دفاع وطن کیلئے ہمہ وقت تیاررہتا ہے۔جناب الطاف حسن نے کہاکہ جنرل اشفاق پرویز کیانی کے جراتمندانہ بیان سے قوم کو ایک نیا حوصلہ ملا ہے ، شکوک وشبہا ت میں بڑی حدتک کمی واقع ہوئی ہے اور قوم میں اعتماد اورہمت کی ایک نئی لہر دوڑگئی ہے ۔جنرل کیانی نے جراتمندانہ اور دانش مندانہ مؤقف پیش کرکے پوری قوم کے سرفخر سے بلند کردیئے ہیں ۔پوری قوم انہیں اور ان سمیت مسلح افواج کے ایک ایک افسر اور سپاہی کو سلام پیش کرتی ہے اور دعا گو ہے کہ اللہ تعالیٰ انہیں ہرمقام پر کامیابی عطا کرے۔