ایم کیوایم کی رابطہ کمیٹی کے رکن کیف الوریٰ کا رکنیت سازی مہم کے چوتھے روز بلدیہ ٹاؤن سیکٹر میں لگائے گئے کیمپوں کا دورہ

کراچی :۔۔۔17، نومبر2014ء 

متحدہ قومی موومنٹ کی رابطہ کمیٹی کے رکن کیف الوریٰ نے ایم کیوایم کی رکنیت سازی مہم کے چوتھے روز بلدیہ ٹاؤن سیکٹر میں لگائے گئے رکنیت سازی کیمپوں کا دورہ کیا اور رکنیت سازی کیمپوں پرشمولیت کیلئے آنے والے افراد کو رکنیت سازی فارم پُر کرکے دیئے اور انہیں ایم کیوایم میں شمولیت پر جناب الطاف حسین کی جانب سے دلی مبارکباد پیش کی۔ ملک کے دیگرعلاقوں کی طرح بلدیہ ٹاؤن میں بھی رکنیت سازی کیمپوں پر نوجوانوں ، بزرگوں اور خواتین کا زبردست رش دکھائی دیا ۔ رابطہ کمیٹی کے رکن کیف الوریٰ نے بلدیہ ٹاؤن میں رکنیت سازی کیمپوں پر ایم کیوایم میں شمولیت اختیار کرنے والے افراد سے گفتگو کرتے ہوئے کہاکہ رکنیت سازی مہم جس بھر پور انداز میں ملک بھر میں جاری ہے اس سے ایم کیوایم کی عوامی مقبولیت کا اندازہ لگایا جاسکتا ہے ۔ انہوں نے کہاکہ قائد تحریک جناب الطاف حسین نے ہمیشہ غریب و متوسط طبقے کے عوام کو اہمیت دی ہے اور ان کے حالات زندگی بدلنے کیلئے برسوں سے عملی جدوجہد کررہے ہیں ، رکنیت سازی مہم میں غریب ومتوسط طبقے کا بڑھ چڑھ کر حصہ لینا جناب الطاف حسین اور ایم کیوایم سے والہانہ وابستگی کا ثبوت ہے ۔ کیف الوریٰ نے بلدیہ ٹاؤن میں رکنیت سازی کیمپوں پر اب تک ہونے والی لوگوں کی شمولیت کی تفصیلات معلوم کیں اور رکنیت سازی فارم لیکر ایم کیوایم میں شمولیت اختیار کرنے والے افراد کا خیر مقدم کیا ۔ 
وڈیو دیکھیں