سندھ ہائی کورٹ کے سندھ لوکل گورنمنٹ ایکٹ 2013ء کو غیر قانونی قرار دینے کے تاریخ ساز فیصلے پر اہلیان سندھ سمیت ملک بھر کے مظلوم عوام کو ایم کیوایم کے اراکین سینیٹ کی مبارکباد
سندھ ہائی کورٹ کے فیصلے کے بعد بلدیاتی قانون میں سیاہ ترامیم کرنے والوں کیلئے سبق ہے، اراکین سینیٹ ایم کیوایم
الیکشن کمیشن، عدلیہ اور صوبائی و وفاقی حکومتیں بلدیاتی انتخابات کا 18 جنوری کو انعقاد یقینی بنائیں اور سندھ ہائی کورٹ کے تاریخ ساز فیصلے پر عملدرآمد میں حائل تمام رکاوٹوں کو فی الفور دور کریں، اراکین سینیٹ
کراچی ۔۔۔۔31دسمبر 2013ء
متحدہ قومی موومنٹ کے اراکین سینیٹ نے سندھ ہائی کورٹ کی جانب سے سندھ لوکل گورنمنٹ ایکٹ 2013ء کو غیر قانونی قرار دینے کے تاریخ ساز فیصلے پر اہلیان سندھ سمیت ملک بھر کے مظلوم عوام کو دلی مبارکباد پیش کی ہے ۔ ایک تہنیتی بیان میں انہوں نے کہا کہ بلدیاتی قانون میں ترامیم کے خلاف سندھ ہائی کورٹ کے فیصلے نے ثابت کردیا کہ حکومت سندھ بلدیاتی انتخابات میں دھاندلی کے ذریعے عوامی مینڈیٹ پر قبضہ کرنا چاہتی تھی اور اس ضمن میں ان کی جانب سے بلدیاتی قانون میں غیر قانونی ، غیر جمہوری اور آمرانہ ترامیم کی گئیں جس میں کئی شقیں آئین سے متصادم تھی ۔ انہوں نے کہا کہ سندھ ہائی کورٹ کے عوام دوست اور سچائی پرمبنی فیصلے نے بلدیاتی قانون میں سیاہ ترامیم کے بل بوتے پر حکومت سندھ کے کراچی میں جیالے میئر کے خودساختہ دعوؤں اور سہانے خوابوں کی تعبیر بدل دی ہے اور اب مظلوم عوام جیالے میئر کے دعوؤں اور خوابوں کی حقیقت سے آگاہ ہوچکے ہیں۔ انہوں نے کہا کہ سندھ ہائی کورٹ کے فیصلے کے بعدبلدیاتی قانون میں سیاہ ترامیم کرنے والوں کیلئے سبق ہے لہٰذاوہ نہ صرف اس فیصلے کوکھلے دل سے تسلیم کرے بلکہ طاقت کے نشے میں غیر قانونی ترامیم اور اقدامات پر مزید عمل پیرا ہونے کے بجائے جمہوریت دشمن روش کو فی الفور ختم کریں اسی میں سندھ اور ملک بھر کے عوام کی بھلائی ہے۔ ایم کیوایم کے اراکین سینیٹ نے الیکشن کمیشن ، عدلیہ اور صوبائی ووفاقی حکومتوں سے مطالبہ کیا کہ بلدیاتی انتخابات کا 18جنوری کو انعقاد یقینی بنایا جائے اور سندھ ہائی کورٹ کے تاریخ ساز فیصلے پر عملدرآمد میں حائل تمام رکاوٹوں کو فی الفور دور کرکے بلدیاتی انتخابات کے انعقاد کے حوالے سے ابہام ختم کیا جائے ۔